लः व मिसा

नीरमती वज्राचार्य

ल व मिसा ला व लुसि थें सम्बन्ध दु। लः मदयेकं सुं म्वाये फइ मखु। उकिसनं मिसात ला लः मदयेकं छुं हे याये फइ मखु। मिखाप्वाः चायेवं हे मिसातय् लःया निंतिं संघर्ष शुरु जुइधुंकी। च्या त्वनेगुनिसें कयाः बहनीया नयेगु तक लः मदयेक मगाः। थ्वहे लखं वसः हीमाल, चःबि च्वयेके माल, यावत चीजयातलः माल। तर थौंकन्हय् तःधंगु समस्या हे हानं लःयागु दु। प्राण धाने यायेत माःगु लः छता हे सरकारं व्यवस्था याये फुगु मखु। वालय् छक्वः लः छ्वयाः छाय् सरकारं तमाशा स्वयाच्वंगु खः? लःया निंतिं मिसातय्सं अपाय्च्वः दुःख सी मालाच्वंगु दु। चांचां मिसात जक दने फइगु ला? छु मिसात चान्हय् लः फः जुइ ग्यानापु मजुइ ला? बिचरा मिसात छु निं याये? आः ला मिजंतय्सं नं लःया निंतिं संघर्ष मयासें मगात। ई ब्यः मदयेक वइगु लः फयेत मिजंत नं धर्ना कसे मयासें मगात ।

ट्यांकरं इउँ वइगु लः कायेत मिजंत ब्वाँय् ब्वाँय् जुइमाल नि। लः वःसा हानं बिजुली मदु। जमिनया बोरिंग लः गुलि सालेगु? भूगर्भशास्त्री धाःपिं हालाच्वंगु दु छन्हु काठमाडौं दुना वनी तिनि धकाः। तुं सुना वन, ल्वहंहिति गना वन, खुसि दक्वं धः व साःगाः जुल। बुंगाःचा मदया वन। सर्गतं वा मवल। अले लः जक गनं वइ? बुँया बुँ जुयाच्वंगु काठमाडौं आः छेँया छेँ जुइधुंकल। सकसितं उलि हे लः माः। हिमालय् तकं च्वापु मदयाः हाकुसे च्वना वयेधुंकल। मेलम्चीया लः वइतिनि धकाः नेतात हालाच्वंगु आः मखु ।

लः बिना म्वाये फुपिं सुं प्राणी मदु। सरकारय् वनीपिं अप्वः यानाः मिजंत। उमिसं लःया निंतिं मिसातय्त जुइगु दुःख मसिउ। आः पसः पसलय् मचिकं न्याये थें लः न्यायेत मिजं मवसें मगायेधुंकल। आः सरकारं लःया व्यवस्था याना बी धकाः पियाच्वनेगु ई नं मखुत। आः मिसातय्सं सर्गतं वइगु लः हे मुनाः सिले साले याये माल। छेँय् थलबलय् लः मुनातये फुसा तिनि छम्ह मिसा याउँक द्यने फइ। लः मदुसा मिसामिजं ल्वापु नं जुइ। लःया कारणं थ्वदेशय् छु छु जुइ तिनि बांलाक बिचाः मयासे मगाःनि। मिसातय् थ्व व्यथा राष्ट्रं मथुइकुसें मगाः। उकिं लः मिसातय् लागि चितासू जूगु दु। लःहे सुख शान्ति जूगु दु ।

More Stories Like this