प्रजातान्त्रिक योद्धाया बिदाई
स्वक्वः तक प्रजातन्त्र प्राप्तिया आन्दोलनय् सक्रिय जुया आन्दोलित जुयादीम्ह गिरिजाप्रसाद कोइरालां शनिवाः थ्व संसारं बिदा कयादिल । पुलाम्ह प्रधानमन्त्री नापं नेपाली कांग्रेसया सभापति कोइराला प्रजातन्त्रया निंतिं न्ह्यावलें सक्रिय जुया ल्वानादिथें वय्क ताः ई न्ह्यः निसें थःगु स्वास्थ्य अवस्था नाप नं सक्रिय जुया ल्वानाच्वनादीगु खः । वय्कया निरन्तर कुतःया बाबजुद नं शनिवाः न्हिनय् १२:११ इलय् वय्कलं झी सकल नाप बिदा कयादिल ।
खुइदँ तक नेपाःया राजनीतिइ सक्रिय जुयादीम्ह कोइरालाया जन्म विक्रम संवत् १९८१लय् जूगु खः । मदुम्ह कृष्णप्रसाद कोइराला व वय्कया कान्छीम्ह जहान दिव्या कोइरालाया कान्छाम्ह काय् कथं कोइराला १९८२लय् भारतया बिहार राज्या टेडीलय् जन्म जुयादीगु खः ।
निरंकुश राणा शासनया इलय् देश निकाला जुयादीम्ह कृष्णप्रसाद कोइराला भारतय् दुगु इलय् जन्म जुयादीम्ह कोइरालां अनया तःधंगु राजनीतिक ह्यूपाः स्वयेगु ह्वताः चूलात । उकी पाखें हे प्रभावित जुयाः २००४ सालय् विराटनगरं मजदुर हडताल पाखें वय्क नेपाःया राजनीतिकलय् प्रवेश यानादीगु खः ।
नेपाल ट्रेड युनियन कांग्रेसया संस्थापक दुजः जुयादीम्ह कोइराला २०१७ सालय् तत्कालिन जुजु महेन्द्रं पञ्चायत व्यवस्था लागू यानाः ज्वना मयंकूतल्ले नेपाली कांग्रेस मोरङया सभापति जुयादीगु खः । वय्कलं पञ्चायत व्यवस्थाया विरुद्ध आन्दोलन याःगुलिं न्हय्दँ जेलय् कुनातःगु खः । २०३३सालय् जूगु कांग्रेसया महाधिवेशनं महामन्त्री ल्ययादीम्ह कोइरालां २०४७साल तक महामन्त्रीया भाला क्वबुयादिल ।
कोइरालाया इहिपा सुष्मा कोइराला नाप जूगु खः । कोइरालाया जहान २०३१ सालय् हे मदुगु खः । वय्कपिं पाखें छम्ह म्ह्याय् दी । वर्तमान उपप्रधान नापं परराष्ट्रमन्त्री सुजाता कोइराला वय्कपिनि छम्ह जक म्ह्याय् खः ।
पञ्चायत व्यवस्थाया अन्त्य नापं शुरु जूगु बहुदलीय व्यवस्था धुंकाः जूगु न्हापांगु आम निर्वाचनय् वय्क मोरङ क्षेत्र नम्बर १ व सुनसरी क्षेत्र नम्बर ३ पाखें निर्वाचित जुयादिल । लिपाः २०४८सालय् नेपाली कांग्रेसया नेतृत्वय् गठन जूगु सरकारय् वय्क न्हापांगु पटक प्रधानमन्त्री जुयादिल ।
नेपाली कांग्रेसया २०५३ सालय् जूगु गुक्वःगु महाधिवेशन पाखें सभापति जुयादीम्ह कोइराला २०५४य् निक्वःगु खुसीइ हानं प्रधानमन्त्री जुयादिल । अथहे २०५६य् कांग्रेसया इतिहासय् न्हापांगु पटक जूगु संसदीय दलया नेताया चुनाव त्याकाः स्वक्वःगु खुसीइ प्रधानमन्त्री जुयादिल ।
न्हापा माओवादी प्रति तसकं आक्रामक जुयादीम्ह कोइराला प्रधानमन्त्री जुयादीगु इलय् माओवादीयात ल्वाभ: पाखें हे सिधेकेगु नीति ज्वंगुलिं तच्वकं आलोचित जुयादिसां लिपा वय्कलं हे माओवादीयात सशस्त्र द्वन्द्व पाखें नेपाःया राजनीतिक मूल धारय् ह्येत अहम भूमिका म्हिता दक्वसियां बधाईया पात्र जुयादिल ।
२०५८सालय् तत्कालीन जुजु ज्ञानेन्द्रं शासन सत्ता थःगु ल्हाति कायेधुंकाः माओवादी नाप दिल्ली वनाः झिंनिगू बुँदे सहमति यायेत नं वय्कलं तःधंगु भूमिका म्हितादिल । उगु सम्झौता लिपाः जुजुया प्रत्यक्ष शासनया विरुद्ध माओवादी सहितया जनआन्दोलनयात वय्कलं हे नेतृत्व यानादिल ।
जुजुया प्रत्यक्ष शासन लिपाः संसद पुर्नस्थापना जुइधुंकाः वय्क हानं प्यक्वःगु खुसीइ २०६३सालय् नेपाःया प्रधानमन्त्री जुयादिल । अथेहे पुर्नस्थापित संसदं जुजुया अधिकार क्वपालाः नेपाःया कार्यकारी अधिकार जनता पाखें निर्वाचित जूपिं जुइगु व्यवस्था यायेधुंकाः वय्क राष्ट्र प्रमुख सहित नेपाःया प्रधानमन्त्री जुयादिल । उगु इलय् वय्क न्याक्वःगु खुसीइ प्रधानमन्त्री जुयादीगु खः ।
नेपालय् जूगु स्वंगू प्रजातान्त्रिक आन्दोलनय् सक्रिय भूमिका नापं नेतृत्व नं बियादिम्ह कोइराला प्रधानमन्त्री जूगु इलय् हे नेपालय् न्हापांगु पटक संविधानसभाया चुनाव नं जुल । अनेकौं राजनीतिक त्वाथः गयादीधुंकूम्ह कोइरालां शान्ति प्रकृयाया नेतृत्व यानादीगुलिं नं वय्कया राजनीतिक उचाँइ झन अप्वःगु खः ।
अन्तर्राष्ट्रिय ख्यःया तकं बधाईया पात्र जुयादीम्ह कोइरालायात भारतया प्रधानमन्त्री मानमोहन सिंह लाः एसियाया हे दकलय् उच्च नेताया संज्ञा बियादीगु खः । थंज्याःगु सम्मानं छाय्पिम्ह कोइराला थौं झीनाप मदुसां वय्कया आदर्श व बिचाः झीनाप सधां ल्यनां तुं च्वनी ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
