प्रचलित नेपाललिपिया युनिकोड दयेकीगु

प्रचलित नेपाललिपिया युनिकोड आखः दयेकेगु बारे थौं येँया हारति होटलय् छगू सहलह मुँज्या जुल । नेपालभाषा केन्द्रीय विभाग यलया प्रमुख प्रेमशान्ति तुलाधरया प्रमुख आतिथ्य व नेपाल लिपि गुथिया नायः शरद कसाः कसाःछेँया सभापतित्वय् जूगु उगु ज्याझ्वलय् नेपालभाषा व लिपि ख्यःया हनेबहःपिन्सं ब्वति कयादीगु खः ।

उगु ज्याझ्वलय् नेपाललिपिया युनिकोड दयेकेगु खँय् नेपाल लिपि गुथिया शरद कसाः व नेपाल लिपि डट कमया सुवन वज्राचार्यपाखें कार्यपत्र न्ह्यब्वयादीगु खः । कार्यपत्रयात कयाः लक्ष्मण राजवंशी, काशीनाथ तमोट, नरेशवीर शाक्य, तेजरत्न कंसाकार आदिपिन्सं टिप्पणी यानादीगु खः ।

प्रतापमान शाक्यं न्ह्याकादीगु उगु ज्याझ्वः न्ह्याये स्वयां न्ह्यः मदुम्ह लिपि विज्ञ हेमराज शाक्यया लुमन्तिइ एक मिनेटया मौनधारण याःगु खः ।

More Stories Like this