नुगः काइँया मिनीगु गाडी दुर्घटना

सुदूर पश्चिमय् हानं छगः यात्रुवाहक बस दुर्घटना जुयाः आपालं मनू सीगु दु। थ्व ध्वः च्वयाच्वनागु इलय् तक ३१ म्ह मनू सीधुंकूगु ल्याः पिहां वःगु दुसा मेपिं अझ झिम्ह खुसिइ तनाच्वंगु दनि धाःगु दु। पश्चिमया कर्णाली खुसिइ बस कुतुं वनाः थ्व दुर्घटना जूगु खः। मात्र छगः बस दुर्घटना जुयाः थुलिमछि मनू सीगु थ्व तःधंगु मध्येया हे छगू घटना खः।
नेपालय् गाडी दुर्घटनाय् लानाः यक्व मनू सीगु थ्वहे न्हापांगु घटना मखु। अप्वः धइथें थज्याःगु दुर्घटनाया कारण धइगु गाडीइ यक्व मनू तया हइगु हे जुयाच्वंगु दु। आः दैलेखय् दुर्घटना जूगु गाडीइ नं छतय् समेत ल्याः खाये मफयेक मनू तयाहःगु खः। थुकिं हे गाडीया नियन्त्रण तंकाः थज्याःगु दुर्घटना याकीगु खः। उकिं गाडीइ क्षमता स्वयां अप्वः यात्रु तयेगु ज्यायात कडा रुपं पनेमाःगु दु। थुकियात प्रहरी प्रशासनं पनेगु ला थःगु थासय् द हे दु, उकिया नापनापं सम्बन्धित यातायात सेवां नं उकियात नियन्त्रण यायेमाःसा दकलय् न्हापां स्वयं यात्रुं अज्याःगु यात्रा मयायेगु ज्या यायेमाः। हथाय्, वने हे माः, आदि धइगु त्वहःचिनाः यात्रुत न्ह्याथेंज्याःगु खतरापूर्ण यात्रा यायेत तयार जुयाच्वंत्तले यातायात व्यवसायीतय्सं हे ध्यबा कमे यायेगु लागिं यात्रुयात म्येय् व दुगुचा सरह कोचे याइगु स्वाभाविक खः। उकिं थुकी यात्रु सचेत जुइमाःगु न्हापांगु शर्त खः। यदि व्यवसायीं अथे यानाः नं तयेगु कुतः यात धाःसा उकियात बहिष्कार यायेगु नापं प्रशासनय् वनाः उकिया उजुरी तयेगु ज्या नं यात्रुं याना बीमाः। प्रशासनं नं दुर्घटना लिपा लाश ल्याः खायेगु सिबें दुर्घटना हे याके मबीगु पाखे कडा कारवाही न्ह्याकूसा जनताया अकाल मृत्युयात पने फइगु खइ ।

More Stories Like this