प्रम जुइत सुजाताया कुतः
सुजाताया लागिं राजीनामा बीम्ह सभासद् मालाच्वन
शंकर ताजपुरियायात इनाप, तर कृष्ण सिटौलां पना तल
येँ (सन्ध्या टाइम्स)/देशय् सरकार हीकेगु कासा शुरु जुयाच्वंगु इलय् लाक्क उखे उपप्रधानमन्त्री एवं नेकां सभापति गिरिजाप्रसाद कोइरालाया म्ह्याय् मय्जु सुजाता कोइरालां धाःसा थ्वहे मौकाया लबः कयाः थः नं संविधानसभाय् दुहां वनेगु ह्वःताः मालाच्वंगु खँ सीदुगु दु। प्रधानमन्त्री जुइगु लागिं अनिवार्य रुपं संविधानसभाया दुजः जुइमाःगु जुयाः वय्कलं थः नं दुजः जुइगु कुतः यानाच्वंगु खँ सूत्रं धाःगु दु ।
चुनाव बूम्ह जूसां एमाले नेता माधव नेपालयात संविधानसभाया तत्कालिन दुजः सुशीलचन्द्र अमात्यं राजीनामा बियाः थाय् त्वःता बिउगु खःसा आः सुजाता कोइरालां नं थःगु लागिं थाय् त्वःता बीपिं कांग्रेसी सभासद्त मालाच्वंगु दु। वय्कःया लागिं थाय् त्वःतीपिं सुं हे पिहां मवःसां मय्जु कोइरालां झापाया मनोनित सभासद् शंकरप्रसाद ताजपुरियायात राजीनामाया लागिं तयार यानादीगु खँ सूत्रं धाःगु दु ।
सूत्रया कथं ताजपुरियायात थाय् त्वःता बिउगु वापत ध्यबा बीगु शर्तय् कोइरालां माने याःगु खः। तर कालबिलया खँ स्पष्ट जुइधुंकाः नं अन्तिमय् वयाः ताजपुरियां राजीनामा मयायेगु खँ धया हःगुलिं कोइराला हीमी चायाच्वंगु खँ नं सूत्रं धाःगु दु ।
सूत्रं बिउगु जानकारी कथं सभासद् ताजपुरियायात राजीनामा बीगुपाखें पनेगु ज्या धाःसा मेपिं सुं मखुसें कांग्रेसया हे मेम्ह नेता एवं पुलांम्ह गृहमन्त्री कृष्ण सिटौलां याःगु खः। सिटौलां राजीनामा याये मते धकाः पनातःगु कारणं ताजपुरिया थौंकन्हय् सुजातापाखें तातापाक वनेगु यानाच्वंगु खँ सूत्रं धाःगु दु ।
सभासद् ताजपुरियां न्हापा जिउ धायेधुंकाः आः बिसिउँ बिसिउँ जुयाच्वंगु कारणं वय्कःयात सुजाताया अबु एवं नेकां सभापति गिरिजाप्रसाद कोइराला थम्हं हे सःताः सुजाताया लागिं राजीनामा याना बिउ धकाः निक्वः तक इनाप यायेधुंकूगु खँ सीदुगु दु ।
