हिन्दू उत्पीडनं मुक्ति निंतिं धर्म निरपेक्षता

लोकबहादुर शाक्य

धर्म अधर्म म्हसीकेगु गुकथं?:
अप्वः मनूत अन्धविश्वास, भावावेश व परम्परागत प्रचलनय् आशक्र जुयाः सही सिद्धान्तया व्यावहारिक पक्षय् अनभिज्ञ जुयाच्वनीगु जुल। मू खँ ला व्यावहारिक जगतय् शुद्ध चित्तया जीवन हनाच्वगु दु लाकि मदु? कोरा सैद्धान्तिक पक्षय् न्ह्यज्यानाच्वन कि धइगु विषयय् कल्याणमित्रपिं नाप सहलह यानाः व्यावहारिक पक्षया सही आचरण ध्वाथुइकाः जीवन हनेमाल। यथार्थ रुपं थुइके माःगु खँ ला शुद्ध चित्तय् आधारित आचरण हे धर्म खः। अझ गुगुं नं भेषभूषा पुने वा मपुने, विशेष कर्मकाण्ड सम्पन्न याये वा मयाये, गुलिं विशेष र्दाशनिक मान्यता माने याये वा मयाये ।

मन-मानस द्वेष-दौर्मनस्यपाखें भय बियाच्वंसा सर्वथा धर्महीन जुइगु जुल। अले स्नेह-सौमनस्यं सुरक्षित जुयाच्वंसा सत्धर्म जुइ ।

सत्धर्मया फल थनया थन हे:
गबलय् तक धर्मया यथार्थ मणि प्राप्त याये फइ मखु उबलय् तक कंगाल जुयाच्वनी। जीवन निस्सार जुयाच्वनी। निरर्थक कर्मकाण्ड व निकम्मा अधोगतिं भय बियाच्वनी। थज्याःगु अवस्थाय् नं दुनुगलं चिन्तन मनन यानाः हरेस मनसे धर्मया सार चित्तया शुद्धताय् दु, राग-द्वेष-मोहया बन्धनं मुक्त जुइगुली दु, विषम स्थितिइ नं चित्तयात स्थिर याना तयेगुली दु, मैत्री-करुणा-मुदिता भावना ब्वलंकेगुली दु, कुशलमंगल सेवा ज्याखँ यायेगुली दु धकाः वोध यानाः मानवीय गुण पालन यायेमाःगु लुमंकाः चर्या याये माल। थुकथं धर्मया शुद्धता थुइकेगु सम्झे जुइगु, निरीक्षण यानाः जाँच यायेगु धइगु रोग मुक्तिया न्हापांगु पलाः जुल। शुद्ध धर्म न्ह्याबलें स्पष्ट तथा सुवोध जुयाच्वनी। धर्मया शुद्धता ताकसिं वा कपोलकल्पनाय् जुइ मखु। यथार्थताय् जुयाच्वनी। हानं कोरा सिद्धान्तय् मजुसे स्वयं साक्षात्कार तथा अनुभव याये फइगु जुल। धर्मं आदि, मध्य, अन्त न्ह्यागु अवस्थाय् नं कल्याणकारी जुइगु खः। सर्वसाधारणया निंतिं समान रुपं ग्रहणयोग्य जुयाच्वंगु दु ।

निर्भ्रान्त दृष्टि: धर्मया सुष्टि:
वचनया कर्म, म्हया कर्म, सम्यक आजीविका (विष प्राणी, प्राणी, ला, मादक पदार्थ मीगु ज्या मयासे मेगु हितकारी व्यवसाय यायेगु), मानसिक स्वास्थ्यया कसरत, जागरुकताया अभ्यास, एकाग्रताया कुतः, चिन्तन मनन चर्या शुद्ध यासें जीवनजगत प्रति दृष्टिकोण शुद्ध यायेगु शुद्ध धर्म जुल। अहंकारविहिन, अपरिग्रह हेतु निस्वार्थ भावं बियागु दान शुद्ध धर्म खः। सदाचार पालन यायेगु, अथवा हिंसा, खुइगु, व्यभिचार, असत्य वचन, काये यःगु पदार्थ, नशालु पदार्थ सेवनपाखें बचे जुइगु शील पालन यायेगु नं शुद्ध धर्म जुल। मनयात वशय् तयाः राग, द्वेष, मोह निर्मूल यानाः सम्यक समाधिपूर्ण चर्या यायेगु नं शुद्ध धर्म खः। 'जि-जिगु' अथवा प्रिय-अप्रिय मूलक भावना मतसे व्यक्ति, वस्तु तथा स्थितिया गथे खः अथे यथाभूत प्रज्ञापूर्वक खंकेगु कसरत यानाः चित्तया समान व निष्कलंक दृष्टिकोण ब्वलंकेगु नं शुद्ध धर्म जुइगु जुल ।

विज्ञापनया विषय मखु धर्म:
विपस्यना आचार्य सत्यनारायण गोयन्काकृत 'धर्म आदर्श जीवन का आधार' सफुली न्ह्यथनातःगु दान, शील, समाधि तथा प्रज्ञाया अभ्यास सार्वजनीन, साम्प्रदायिकताविहिन, सर्वजनहितकारी, अले लोकंह्वाःगु कथं प्रचार प्रसार जुयाच्वंगु अतिकं महत्वपूर्ण खः। तर थज्याःगु अमूल्य सिद्धान्तयात अनुकरण मयासे धर्मया नामय् अभिनय, विज्ञापनबाजी तथा दार्शनिक वादविवाद यानाः अझ वचन व बुद्धि विलास मयासे आत्म व जग प्रवंचनाय् फँसे जुयाच्वंपिं नं दुगु जुल। आत्महित तथा परहितया निंतिं शुद्ध धर्मया जीवन हनेगु थुइके माल। शुद्ध धर्मया सार ग्रहण यात कि मैत्री-करुणा, स्नेह-सद्भाव, त्याग-बलिदान, सहयोग-सहकार, श्रद्धा-विश्वास, अभ्युदय-विकास भय्बियाः जीवन ओजस्वी, तेजस्वी, अभय, अचिन्त्य, सहज, सरल, स्वच्छ, मंगल, कल्याण जुइगु जुल ।

धर्म पक्षपाती बाबातय् चाहना छु?
नेपालय् एकतन्त्री शासन इलय् छगू धर्मया प्रभुत्व जुयाच्वंगु खः। २००७ सालय् प्रजातन्त्र प्रादुर्भाव जुसेंलि थःथःगु धर्म माने यायेदतसां धर्म निरपेक्ष राज्य मदयाः स्वतन्त्र व समान रुपं धर्म माने यायेत मछिनाच्वंगु जुल। नेपाःया अन्तरिम संविधान-२०६३ स धर्म निरपेक्ष राज्य घोषणा जूगु लोकतान्त्रिक गणतन्त्रया देन खः। तर थौं म्हिगः निहित स्वार्थं प्रेरित जूपिं सुं सुं मनूतय्सं तमाशा क्यनाः देय्या नाजुक स्थितिपाखें मौक कयाः धर्म निरपेक्ष राज्यया विरोध यासें हिन्दू राज्यया माग यानाः खतरनाक ज्याखँ जुयाच्वंगु खने दया वःगु दु। 'धर्म निरपेक्षतां देय् कुचा थली, जातीय ल्वापु तच्वयेकी व नेपाःया विशेष पहिचान तंकी' धइगु कुतर्क न्ह्यब्वयाः पशुपतिया वनकालीइ होम यज्ञादि यानाः आत्मदाहया ख्याच्वः न्यंकेगु धइगु सुं नं सत्पुरुषया सद्धर्म फइ फइ मखु। नेपाःमि मात्रया दथुइ सद्भावना, एकता, भ्रातृत्वपूर्ण प्रेमया चाहना व कामनां गुगुं नं धार्मिक अनुष्ठान जूगु खःसा सकसिनं सराहना व प्रशंसा याइ। तर थुकिया अःखः सलंसःदँनिसें नेपालीतय्त विभाजित व शोषित याये कथं छ्यःगु धर्म, जाति, भाषाय् भेदभावया अवशेष ल्यंका तयेगु पाय्छि मजूगुलिं मनुष्यत्वया ख्याल यानाः धर्म निरपेक्ष राज्य कायम यायेत मानवीय गुण विवेक बुद्धि छ्यलेत इनाप यानाच्वना। अप्वः धइथें देशय् धर्म व जातिया विषययात कयाः इलय् ब्यलय् कचवं तथा अशान्ति जूगु न्यनेदु। समुन्नत तथा शान्तिपूर्ण समाज सिर्जना यानाः विश्वशान्तिया निंतिं भौतिक विकास नापं आध्यात्मिक उन्नति अनिवार्य जुयाच्वंगु दु। आध्यात्मिक विकासया झ्वलय् शुद्ध धर्म पालन मयासे मगाःगु खँ ल्वःमंके मजिल ।

More Stories Like this