कुर्सी मोहया अभूतपूर्व प्रदर्शन

प्रधानमन्त्री माधव कुमार नेपालयात देशय् मयासें मगाःगु अनेक ज्याखँत मध्ये थःगु सरकार बचे यायेगु ज्या हे दकलय् महत्वपूर्ण ज्या जुयाच्वन धइगु खँ हानं छक्वः पुष्टि जुल। वय्कःया सरकार विरुद्ध माओवादीं अविश्वासया प्रस्ताव तइन धइगु खँ सार्वजनिक जुइसातकि वय्कलं थःगु ज्या यायेगु शैली व दैनिक कार्यतालिकाय् हे ब्यापक हिउपाः हयादीगु दु। अविश्वास प्रस्तावया चर्चा नापनापं वय्कलं सर्वदलीय बैठक सःतेगु, गुगुं नं सार्वजनिक कार्यक्रमय् वनाः उद्घाटन व भाषण मयायेगु, वालुवाटारय् पार्टीया असन्तुष्ट नेतात सःताः भ्वय् नकेगु, पार्टीतलिसे अलग अलग सःताः खँ ल्हायेगु, संविधान निर्माणया ज्याय् वयाच्वंगु पंगः चीकेगु थेंज्याःगु ज्याखँत शुरु याना हःगु दु। वय्कःया दिनचर्याय् खने दया वःगु थ्व हिउपालं प्रधानमन्त्री नेपालया कुर्सी अविश्वासया प्रस्ताव नांगु फसं हुतुहुतुं सना हःगु संकेत बियाच्वंगु दु। अले उकियात थामे यायेगु लागिं प्रम नेपालं न्हापा गबलें मक्यंनि कथंया स्फुर्ति क्यना हःगु दु ।

खतुं माओवादीं विशेष अधिवेशन सःतेगु धकाः हल्ला याःसां अविश्वास प्रस्ताव तइगु खः लाकि मखु धइगु खँ धाःसा अझं क्वःजिउगु मदुनि। अथे खःसां सरकार बचे यायेगु लागिं प्रम माधव नेपालं क्यनादीगु अभूतपूर्व सक्रियतां वय्कःयाके सत्तालिप्सा बाहेक मुलुकया लागिं मेगु छुं हे कार्यक्रम मदु धइगु खँ स्पष्ट याना बिउगु दु। देय् थज्याःगु गम्भीर संक्रमणया मोडय् थ्यनाच्वंगु इलय् नं थःगु डेढ फिट तजाःगु कुर्सी छगू बाहेक मेगु छुं हे सोच तये मफुम्ह मनूयात प्रधानमन्त्रीया रुपय् क्वबियाः मुलुक घिसे जुयाच्वने माःगु झी नेपाःमिया दुर्भाग्य खः ।

More Stories Like this