खाचा तन धकाः म्ह्याय् स्यात
काययात नं खुकरीं पाल
येँ (सन्ध्या टाइम्स)/छेँय् लहिनातःपिं खाचा इमां दाया यन धकाः छम्ह मनुखं खाचा स्वयाच्वंपिं थः हे निम्ह मस्तय्त खुकुरीं पाला बिउगु दु। खुकुरी प्रहारय् लानाः म्ह्याय्म्ह सीगु दुसा कायम्ह घाःपाः जूगु दु ।
पूर्वया पाँचथर जिल्लाय् थ्व घटना जूगु खः। अनया नागी गाविस वडा नं. २ या सूर्य लक्समं थः निम्ह मस्तय्त उकथं खुकुरीं पाःगु खः ।
थः पिहां वनेत छेँय् लहिना तःपिं खाचा स्वयाच्वँ धकाः वं निम्ह मस्तय्त भाला बिया थकूगु जुयाच्वन। लिहां वःबलय् खाचा मदु। गन वन धकाः न्यंबलय् मस्तय्सं इमां दाया यन धकाः लिसः बिल। उलि न्यनेवं हे तं पिकयाः वं निम्हं मस्तय्त खुकुरीं पाला बिउगु खः ।
वयागु खुकुरी प्रहारय् लानाः झिदँ दुम्ह म्ह्याय् राममाया अन हे सीगु खःसा झिंप्यदँ दुम्ह काय खगेन्द्र बांमलाक घाःपाः जूगु दु ।
घाःपाः जूम्ह खगेन्द्रं धाः कथं अबुं खुकुरीं पालाः नं दायाच्वंबलय् व छम्ह बिसिउँ वयाः ज्यान बचे यायेत ताःलाःगु खःसां केहेँम्ह धाःसा बिसिउँ वये मफयाः अप्वः प्रहारय् लाःगु खः। खगेन्द्रयात आः स्थानीय गोपेटारय् वासः याकातःगु दु। घटना बारे प्रहरीं अनुसन्धान शुरु याःगु दु ।
