वाम पार्टि मंकाः मुँज्या
थवंथवया मतभेद मदयेकेगु कुतः
नेपाःया वामपन्थी पार्टि दथुइ ब्वलनाच्वंगु तिक्तता म्हो यायेगु निंतिं कन्हय् छगू वृहत वाम पार्टि भेला जुइत्यंगु दु । देय्या वामपन्थी बुद्धिजीवीतय् कुतलय् उगु भेला जुइत्यंगु खः । भेला गन जुइ धइगु खँ धाःसा सी मदुनि ।ग्वसाः खलकय् दुथ्याःम्ह छम्ह वाम बुद्धिजीवीं कनादी कथं वामपन्थी पार्टि दथुइ ब्वलंगु तिक्ततां यानाः नेपाःया राजनीतिक वाता-वरण स्यना वनाच्वंगुलिं थ्व भेला यायेत्यंगु खः ।
वाम पार्टि दथुइ संवादया वातावरण मदयाच्वंगुलिं थज्याःगु तिक्तता ब्वलंगु विश्लेषण यासें बुद्धिजीवीतय्सं थ्व भेलाया ग्वसाः ग्वःगु खः । कन्हय्या भेलाय् सकलें वामपन्थी पार्टिसं ब्वति कायेगु बचं बिउगु जानकारी नं वय्कलं बियादीगु दु । संविधानसभाय् गणतन्त्र, राष्ट्रियता, जनवाद, आर्थिक विकास व समाज- वादया निंतिं न्यूनतम सहमति कायम यायेगु कुतः भेलाय् जुइगु खँ नं धाःगु दु ।
लिसें राजनीतिक पार्टि दथुइ छुं नं कथंया मतभिन्नता दुसा उकियात थः दुनें तुं ज्यंकेगु निंतिं नं बुद्धिजीवीतय्सं इनाप याइगु खँ धाःगु दु । वाम पार्टि दथुइ त्वाःदला- च्वंगु संवादयात हाकनं न्ह्याकेत थ्व भेलां ग्वाहालि याइगु खँ नं वय्कलं कनादिल ।
सरकार, संविधानसभा व जनमत वामपन्थी पार्टर्ीी् पक्षय् दुसां नं उकिया महसुस नेपाःमि जनतां याये मफयाच्वंगुलिं उकियात कयाः नं सहलह ब्याकीगु खँ धाःगु दु ।
भेलाय् एकीकृत नेकपा माओ- वादीया अध्यक्ष पुष्पकमल दाहाल प्रचण्ड, नेकपा -एमाले)या महासचिव झलनाथ खनाल, नेकपा -मसाल) या मोहनविक्रम सिंह, नेकपा -संयुक्त) या विष्णुबहादुर मानन्धर, नेमकिपाया नारायणमान बिजुक्छे लगायत फुक्कं वामपन्थी पार्टि केन्द्रीय नेतातय्सं ब्वति काइगु खँ धाःगु दु ।
भेलाय् वामपन्थी बुद्धिजीवीतय्सं फुक्कं पार्टित मंकाः इनाप पौ नं लःल्हाइगु खँ धाःगु दु । थ्व भेला लिपा वामपन्थी पार्टि दथुइ सम्बन्ध सुधार जुइगु अपेक्षा बुद्धिजीवीतय्सं याःगु दु ।
