प्रमं नीन्यागू दलयात सःतल

प्रतिपक्षी माओवादीं बैठक बहिष्कार याइगु

येँ (सन्ध्या टाइम्स)/वइगु १५ गते तक छुं नं औपचारिक ज्याझ्वलय् मवनेगु घोषणा यानादीम्ह प्रधानमन्त्री माधव कुमार नेपालं थःगु नेतृत्वय् दुगु सरकार बचे याना तयेगु नापं न्हूगु संविधान निर्माण बारे सहलह यायेत थौं संविधानसभाय् दुथ्याःगु नीन्यागू दलया सर्वदलीय बैठक सःतादीगु दु ।

म्हिगः आकाझाकां प्रम ज्याकुथिं नीन्यागुलिं दलयात फोन यानाः थौं न्हिनय् १ बजे सर्वदलीय मुँज्या च्वनीगु दु धकाः सःतूगु खः। बैठक सिंहदरवारय् च्वंगु प्रधानमन्त्री ज्याकुथी च्वनी। थौंया मुँज्याया एजेण्डा बारे छुं नं जानकारी बिउगु मदुसां वर्तमान सरकार, सेना समायोजन, न्हूगु संविधान निर्माण व स्वंगू दलं दयेकातःगु उच्चस्तरीय राजनीतिक संयन्त्रयात कयाः सहलह जुइ धकाः अनुमान यानाहःगु दु।
न्हापा न्हापा नं प्रधानमन्त्री नेपालं गबलें सरकारय् दुथ्याःगु दल, गबलें नीन्यागू हे दलया मुँज्या इलय् ब्यलय् सःताच्वंगु खःसा ता ई लिपा जक थौं सर्वदलीय मुँज्या सःतूगुलिं अर्थपूर्ण जुइमाः धकाः अनुमान याना हःगु दु। मुँज्याय् एनेकपा (माओवादीं) हइगु धकाः चर्चाय् वयाच्वंगु अविश्वासया प्रस्तावयात कयाः नं सहलह ब्याके फुगु खँ धाःगु दु ।

थौं सःतूगु सर्वदलीय मुँज्या प्रमुख प्रतिपक्षी दल एनेकपा (माओवादीं) धाःसा बहिष्कार याइगु जूगु दु। माओवादीया छम्ह नेतां थःपिंसं कठपुतली धया वयाच्वनाम्ह सरकारं सःतूगु मुँज्याय् न्हापा नं वनागु मदु धासें आः नं वनेगु खँ मदु धकाः जानकारी बियादीगु दु। अथे हे मधेशी जनअधिकार फोरमं नं उगु बैठक बहिष्कार याइगु सम्भावना दुगु खँ धाःगु दु ।

उखे थौं हे संवैधानिक परिषद्या बैठक नं च्वनेत्यंगु दु। सर्वोच्च अदालतया प्रधानन्यायाधीश अनुपराज शर्मां थ्वहे चैत्र १२ गतेनिसें अनिवार्य अवकाश कायेत्यंगु जुयाः न्हूम्ह प्र.न्या. मालेत थौंया बैठक च्वनेत्यंगु खः ।

कार्यकर्ता आन्दोलनपाखे
येँ (सन्ध्या टाइम्स)/ माओवादी कार्यकर्तातय्सं आः सरकारय् वनेगु खँ त्वःताः जनआन्दोलन यायेत व जनसंविधान दयेकेत नेतातय्त बः बियाहःगु दु। छम्ह माओवादी नेतां धयादी कथं अप्वः कार्यकर्तातय्सं संविधान निर्माणया अन्तिम इलय् सरकारय् वन धाःसा संविधान दयेके मफुगुया दोष माओवादीयात वइ धासें बरु जनसंविधान मवल धाःसा विद्रोह यायेत तयार जुइमाः धकाः सः तया हःगु खँ धाःगु दु ।