भोग विलासय् लिप्त नेतात

कृष्ण प्रजापति

संविधानसभाया राज्य समितिं आः नकतिनि थीथी सदनय् सहभागी नीन्यागू राजनीतिक दलया नेतातय्त म्हतिं छगः गाडी सुविधा बीगु निर्णय याःगु दु। छगू ल्याखं थ्व सुविधा राज्यं बीगु जुयाः बांलाःगु हे पक्ष खः। तर जनता द्यालानाच्वंगु इलय् राजनीतिक पार्टीया नेतां जक बांलाःगु गाडी गये दइगु सुविधाया छु अर्थ? थज्याःगु सुविधाया खँ २०५१ सालय् एमाले नेता माधव नेपाल देशया उपप्रधानमन्त्री जुयाच्वंगु इलय् नं विवादय् लाःगु खः। उगु इलय् २०५ म्ह सांसदतय्त गाडी सुविधा बीगु कथं एलसी खोले याकूगु खः। सभासद्तय्त बीगु गाडी सुविधा व मेमेगु भत्ता, पेन्सन लगायतया फसुल खर्चयात नेमकिपां विरोध याःगु नं खः। आखिर थज्याःगु फजुल खर्च याये हे मजिउ धइगु महसुस जुयाःलि लिपा उकियात खारेज यात। ताः ई तक शिक्षक जुयाः वा कर्मचारी जुयाः ज्या याःगु बापत जक पेन्सन दइगु खः। तर स्वेच्छां यायेगु राजनीतिक जीवनया राजनीतिक पदय् च्वनाच्वंपिं मनूतय्सं पेन्सन कायेगु गुलि उचित खः ?

न्हय्ला च्याला तक सदनय् हाजीर तकं जूमवँसे थीथी चिन्तन मनन यायेमाःगु इलय् सदनय् पलाः तकं मतसे राज्यं बीगु सुविधा जक कायेत स्वयेगु धइगु नेतात भोग विलासय् लिप्त जूगुया दसि खः। देश निर्माण यायेगु ज्याय् खटे जुइमाःपिं नेतात थथे सुख सुविधाय् जीवन हना जुइगु पाय्छि मखु। वास्तवय् बेलायतया सदनय् मजदूर किसानतय्त थःगु कारखाना वा कृषि फार्मय् यायेमाःगु ज्या दिकाः सदनय् वये मालीगु अवस्थाय् उकुन्हुया ज्याला मदइगु जुयाः सदन वःकुन्हुया भत्ता बीगु ब्यवस्था यानातःगु खः। उच्चपदस्त सम्भ्रान्त सभासद्तय्त थथे न्हिं निसः दां भत्ता बीमाःगु आवश्यकता नं मदु। पशुपति शमशेर थेंज्याःम्ह सभासद्यात निसः दां न्हिं भत्ता कायेमाःगु जरुरी मदु। करोडपतियात अरबपति यायेगु निंतिं सदनय् थज्याःगु सुविधा पेन्सन व भत्ताया ब्यवस्था यायेगु मिले हे मजू। वास्तवय् थ्व ज्या यानाः नइपिं मजदूर व किसानतय्त जक दयेमाःगु सुविधा खः। नेपालय् मजदूर किसान जनता अझ नं थःगु अधिकार व हैसियत कायम यानाः सदनय् थ्यंके मफयाच्वंगुलिं थज्याःगु सः धाःसा तये फयाच्वंगु मदुनि। सभासद्तय्त बीगु भत्ता सुविधायात नं ब्यवस्थित यायेमाःगु आवश्यकता दनि ।

कर्मचारी मखुगु जूगुलिं सदनय् सभासद्तय्सं उपस्थिति जूगु बापत दइगु दैनिक भत्ता बाहेक मेगु फुक्कं दां सुविधा जक खः, तलब मखु। श्रम याःगु बापत जक पारिश्रमिक दइ। राज्यं बियातःगु थीथी सुविधायात तलब कथं नामाकरण याये मछिं। थ्व वास्तवय् सुविधा हे खः। थथे राज्यं माःपिंत माःगु कथं ब्यवस्था यायेगु स्वयेगु खःसा आःया ब्यवस्था असमान जुयाच्वंगु आपालं खने दयावइ। याये धाःगु ज्या मयायेगु, थीथी प्रतिवद्धता लागू मयाःगु स्वयेबलय् राज्यं खालि सभासद्तय्त ह्ययेकेत व राजनीतिक पार्टीयात चकलेट क्यनाः मस्त ह्ययेके थें ह्ययेकेत जक राजनीतिक पार्टीया नेतातय्त थज्याःगु सुविधा बिउगु खनेदु। अथे जुयाः नं नेमकिपा, नेपाः राष्ट्रिय पार्टी गाडी सुविधाया विरोध याःगु दु। थःपिंत वइगु कथं क्वःछिनातःगु गाडी सुविधायात अस्वीकार याःगु दु। चीधंगु राजनीतिक दलं थथे सुविधा अस्वीकार याःगु कारणं निगः स्वंगः गाडी चले यानाः नं मगाःपिं तःधंगु दलया नेतातय्त थ्व निर्णय ल्ह्वये नं मजिउ फाये नं मजिउगु अवस्थाय् लानाच्वंगु दु ।

थथे राजनीतिक पार्टीया सुख सुविधा हे जक स्वयाच्वंगु कारणं असन्तोष जुयाः वर्तमान सरकारयात थःपिंसं बियातःगु समर्थन लित कायेगु ज्या नं जूगु दु। तर वैकल्पिक सरकार बारे छुं क्वःमछिउगु वा आः वइम्ह सरकार नं थुगु सरकार स्वयां गति मलाइम्ह जुयाः थुगु हे सरकारयात विरोध यायेगु वा सदनय् बियातःगु समर्थन लित कायेगु नं गल्ती जूवनीगु जुयाः थ्व इलय् नेमकिपां 'स्व व पिउ' धइगु नीति काःगु खः। थीथी राजनीतिक पार्टीं ला माधव नेपालया थासय् झलनाथ खनाल बांलाःम्ह खः धकाः विकल्प प्रस्तुत यानाच्वंगु दु। तर झलनाथ खनालं हे सही याना तःगु १८ बुँदे प्रस्तावयात लागू यायेगु खँय् आः तक सहलह तकं मयाःगुलिं झलनाथ खनाल जक गुलि योग्यम्ह धइगु क्यं। खनालं सही यानातःगु उगु शर्त गुगुं छगू पार्टीयात जक लबः दइगु विषय मखु। उगु सहमतिया बुँदाय् सरसफाईया खँ, स्थानीय निकाय पुनर्वहाली यायेगु खँ, आदि बुँदात दुथ्यानाच्वंगु दु। तर तःधंगु दल व सरकारय् राजनीतिक संस्कार मदुपिं नेतात हे हावी जुयाच्वंगुलिं माग वा प्रस्ताव पूवंकेगु स्वयां नं सुविधा व भत्ता अप्वयेकाः सरकार टिके यायेगु तिकडम म्हिताच्वंगु खने दु ।

वर्तमान सरकार पंचायती सरकार स्वयां छुं हे मपायेधुंकल धाःसां जिउ। न्हापा पंचायतीकालय् बरु थीथी अपराध व हत्या हिंसा यायेत मनूत ग्याः। आः अज्याःगु ग्याःचिकु सुं हे अपराधीयाके मदयेधुंकल। पंचत सक्रिय राजनीतिक जीवन हनीपिं खः। तर वर्तमान पुँजीवादी नेतात सुख सुविधाया राजनीतिक जीवन जक हनाच्वंगु दु। नये दत धायेवं डोकोय् हे तयाः नयेगु प्रबृत्ति थौंया राजनीतिक नेता व पार्टी दुने विकास जुया वयाच्वंगु दु। थःगु बुद्धिं ज्या यायेगु स्वयां नं संयुक्त राष्ट्र संघया नामय् वयाच्वंगु अमेरिकी शक्ति व भारतीय विस्तारवादी शक्तिया लिउलिउ जुयाच्वंगु दु। अमेरिका व भारतया दथुइ जुयाच्वंगु 'ग्लोबल पोलिटिक्स' पाखें नेपाः नं ब्यागलं च्वने फयाच्वंगु मदु। गबलें उखे गबलें थुखे जुयाः थःगु देशया राजनीतिक आधार हे अन लाः थन लाः मदयेक ज्या यानाच्वंगु दु। अनमिनया नामय् वयाच्वंगु अमेरिकी सेनाया गाडी झन झन अप्वयाच्वंगु खनेदु। थथे जुयाच्वन धाःसा कन्हय् अमेरिकी सेनां हे नेपाली भूमिइ परेड म्हितः वल धाःसां नं झीसं छुं धाये मफइगु स्थिति वयेफु। दक्षिण भियतनाम व दक्षिण कोरियाय् उगु देशया राष्ट्रपतियात हे स्यानाः तकं अमेरिकां थःपिनि सेना यथावत तया तल। झीथाय् अज्याःगु स्थिति वइगु खँय् इलय् हे सचेत जुइमाः ।

More Stories Like this