नेपाःया म्हसीका व पं. हेमराजया योगदान

नेपाःया मौलिक लिपिया अनवरत अनुसन्धान व नेवाः बौद्ध संस्कृतिया धरोहर जुयाच्वंगु स्वयम्भु महाचैत्य लगायत थीथी बाहाःबहीया दुग्यंगु अध्ययन यानाः विश्वया न्ह्यःने तयेगु ज्याय् ज्वः मदुगु योगदान बियादीम्ह पण्डित हेमराज शाक्य म्हिगः मंत। नेपालं थौं नं विश्वया न्ह्यःने ब्वयेगु याना वयाच्वंगु थःपिनि सांस्कृतिक सम्पदा, मौलिक लिपिया विषयय् वय्कलं यानादीगु खोजया मूल्यांकन यायेगु खःसा पण्डित शाक्य नेपाःया छम्ह राष्ट्रिय व्यक्तित्व खः व वय्कःया निधनं मुक्कं राष्ट्रयात हे छगू तःधंगु क्षति जूवंगु दु ।

पण्डित शाक्यं पिकयादीगु थीथी झिंछगू नेवाः लिपिया संग्रहं नेपाःया हे छगू तःधंगु सम्पत्तियात तनीगुपाखें पना बिउगु दु धाःसां छुं मपाः। लोप जुइगु अवस्थाय् थ्यनेधुंकूगु नेपाःया थीथी लिपिया खोज यानाः उकियात वय्कलं संरक्षण यानादीगु कारणं यानाः हे थौं लिपि सम्बन्धी ज्या याइगु थीथी संस्थां उकियात व्यापकता बी खनाच्वंगु खः। लिपि शिक्षणया व्यापकता हे थौं भाषा व जातीय चेतना थनेगु छगू माध्यम जुयाच्वंगु खँय् निगू मत मदु जुइमाः ।

थ्व ख्यलय् थम्हं फुगु योगदान यायेधुंकाः थुकी न्हू पुस्ता नं दुहां वयेमा धकाः वय्कलं हेमराज सिरपाः व हेमराज हःपाः सिरपाः स्वनाः थ्व ख्यः प्रतिया प्रगाढ आस्था नं ब्वयादीगु खः। वय्कः थम्हं नं थ्व ख्यलय् समर्पित जुयाः आपालं सिरपाः व सम्मान प्राप्त यानादीगु दु। वय्कःया हे योगदानं यानाः देश व जातिं नं सम्मान काये खनाच्वंगु दु। वय्कलं न्ह्याका थकूगु थ्व पलाःयात आः न्हूगु पुस्तां निरन्तरता बियाः वय्कःयात सदां जीवित याना तयेमाःगु दु ।

More Stories Like this