हाकनं छक्वः सत्ता समीकरणया कासा

न्हूगु संविधान दयेकेगु धकाः चुनाव यानाः गठन जूगु संविधानसभायात हानं छक्वः सत्ता समीकरणया कासा म्हितेगु खुल्ला तिंख्यः दयेकीगु जूगु दु। एनेकपा (माओवादीं) आः सदनया विशेष अधिवेशन सःतेगु लागिं तयारी शुरु याःगु दुसा थौंकन्हय् दुने हे दर्ता नं यायेत्यंगु दु। देशय् विशेष अधिवेशन हे सःते मायेक अज्याःगु छुं घटना जूगु मदुनि। न्हापा न्हापा नं विशेष अधिवेशन धइगु खास यानाः सरकार हिले माल कि जक सःतेगु याना वयाच्वंगु खः। आः नं माओवादीं विशेष अधिवेशन सःतेत्यंगु सत्ता समीकरणया कासा म्हितेत हे खः धइगु खँय् शंका मदु।
वंगु च्याला गुला न्ह्यः चले जुयाच्वंगु सदनयात माओवादीं निरन्तर घेराउ यानाः नियमित ज्या जक याके मबिउगु मखु बजेट तकं पेश याके मबीगु ज्या याःगु खः। अबलय् जारी सदन तकं चले याके मबिउपिं माओवादीत आः बन्द जुयाच्वंगु सदनया विशेष अधिवेशन सःतेमाल धकाः ब्वाँय् जुयाच्वंगुया लिउने सत्ता समीकरण बाहेक मेगु छुं दुध धकाः बिचाः याये फइ मखु। ख ला सतक संघर्ष यानाः हे सरकार चीके धकाः लगे जूपिं माओवादीतय्सं अन्तिमय् अथे याये मफयेवं आः सदनं सरकार चीकेगु ज्या यायेत्यन धकाः संसदवादीत लय्ताये ला फु। तर विशेष अधिवेशन सःतेगु थ्व ज्यां सरकारयात अस्थिर यानाः संविधान दयेकेगु ज्यायात हानं अलपत्र लाका बीगु धाःसा निश्चित दु। संविधान पिहां वयेत आः करिब निला ति हे जक ई ल्यं दनिगु थ्व इलय् संविधान च्वयेगु ज्यायात छखे त्वःताः सरकार हिलेगुपाखे निं पलाः न्ह्याकेबलय् थुकिं जनतायात अझ गुलि निराश याइगु खः, व ला ल्यं हे दनि ।

More Stories Like this