लछिया दुने सरकार क्वःथलीगु

अविश्वासया प्रस्ताव स्थगित याइगु, माओवादीयात नेतृत्व मबीगु

येँ (सन्ध्या टाइम्स)/प्रधानमन्त्री माधव कुमार नेपालया नेतृत्वय् दुगु वर्तमान सरकारयात लछिया दुने क्वःथलेगु ज्या स्वयं सरकारय् दुथ्याःगु नेपाली कांग्रेस व एमालेया नेतातय्सं हे न्ह्याकाच्वंगु दु ।

राजनीतिक गतिरोध अन्त्यया निंतिं धकाः दयेकूगु उच्चस्तरीय राजनीतिक संयन्त्रय् तकं उगु कथं तयारी न्ह्याकूगु दु धकाः सूत्रं धाःगु दु। न्हूगु संविधान निर्माणया निंतिं एनेकपा (माओवादी)यात सहमतिइ महसे हे मगाःगुलिं नेपाली काग्रेस व नेकपा (एमाले)या नेतातय्सं माओवादीयात नेतृत्व मबिसे कांग्रेस वा एमालेया नेतृत्वय् न्हूगु सरकार दयेकेमाःगु तायेकाः थ्व आन्तरिक तयारी याःगु खः धाःगु दु ।

विशेष यानाः भारतं नं वर्तमान सरकारयात हे यथावत तया तल धाःसा थःपिनिगु अनुकुल संविधान दयेके मफइगु नापं देशय् हे माओवादी हावी जुया वनीगु तायेकाः माओवादी नापं दुथ्याकाः न्हूगु सरकार दयेकेगु प्रस्ताव तःगुलिं हे थ्व सरकार क्वःथलेगु तयारी याःगु खः धकाः नं सूत्रं धाःगु दु।
लिपांगु इलय् वयाः माओवादी पार्टीं नं वर्तमान सरकार विरुद्ध अविश्वासया प्रस्ताव तयेगु धकाः तयारी याःगु इलय् कांग्रेस व एमालेया नेतातय्सं अविश्वासया प्रस्ताव मयंकुसे सहमतिया आधारय् वर्तमान सरकारयात क्वःथलाः न्हूगु सरकार दयेकेगु धकाः तकं खँ हःगु सीदुगु दु ।

वर्तमान सरकारयात कठपुतलि सरकार धकाः धया वयाच्वंगु माओवादी पार्टीयात नं न्ह्याथे यानाः नं वर्तमान सरकारयात क्वःथलेमाःगुलिं दलतय् दथुइ वर्तमान सरकारयात क्वःथलेगु तयारी याःगु खः धकाः नं धाःगु दु।
वर्तमान सरकारयात क्वःथलेगु नापनापं न्हूगु संविधान दयेकेगु विषययात कयाः नं दलतय् दथुइ सहमति जुइ धकाः धाःगु दु ।

थौं संयन्त्रया मुँज्या

उच्चस्तरीय राजनीतिक संयन्त्रया मुँज्या थौं च्वनाच्वंगु दु। फागुन १९ गते च्वनाः नं दिनाच्वंगु उगु संयन्त्रया मुँज्या थौं च्वनाच्वंगु खः। उगु मुँज्याय् म्हं मफुम्ह संयन्त्रया कजि नापं नेपाली कांग्रेसया सभापति गिरिजाप्रसाद कोइराला धाःसा झायादीगु मदु। मुँज्याय् संविधान निर्माण प्रक्रिया, सेना समायोजन नापं सरकारया विषययात कयाः नं सहलह जुइ धाःगु दु। मुँज्याय् प्रचण्ड, झलनाथ खनाल, सुशिल कोइरालां ब्वति कयादीगु दु ।