इन्द्रेणी स्वस्वं

तेजेश्वर बाबु ग्वंगः

रङ्गया नं भाय् दु खनिसा
दः रङ्गया भाय् ल्हाके ब्यू ।
रङ्गया नं लय् दु खनिसा
दः रङ्गया लय् तयेकेब्यू ।
रङ्गया नं मे दु खनिसा
दः रङ्गया मे हायेकेब्यू ।
रङ्गया नं पलाः दु थें खनिसा
दः नं रङ्गया पलाः छिकेब्यू ।
रङ्गया नं लँपु दु सका
दः नं रङ्ग लँपु लुइकेब्यू ।
रङ्गया नं म्हुतुसी दु थें
रङ्गया लसता दः न्हिलेब्यू ।
रङ्गया भाय् यो दः गुलि…
रङ्ग भाय् रङ्गिन जुइ ।
सप्तरङ्ग ला इन्द्रेणी हँ
वैत स्वयेत छकः थस्वैब्यू ।
थस्वस्वं इन्द्रेणी लिसे
थःयात जिं इन्द्रेणी भाःपाःगु ।