ताम्सालिङ व थरूहट बन्द

दमन यात धाःसा स्वन्हु बन्दया ख्याच्वः / बन्दं जनजीवन प्रभावित

येँ (सन्ध्या टाइम्स)/थारू कल्याणकारिणी सभा नापं च्यागू थारू पुचलं थरुहट-तराई लागा अले ताम्सालिङ राष्ट्रिय दलं ताम्सालिङ बन्द याःगुलिं थ्व निगुलिं लागा थौं सुथंनिसें प्रभावित जूगु दु ।

थारू समुदायया खलः पुचलं थरुहट स्वायत्त प्रदेश नापं तराई लागाय् बहुप्रदेश दयेमाःगु माग यासें थ्व बन्द आह्वान याःगु खः। मूल रुपं मधेशवादी दलतय्सं फुक्क मधेश छगू प्रदेशया माग याना वयाच्वंगुया विरोध यासें थारु स्वायत्त प्रदेशया समेतया माग यानाः थौं उगु बन्द आह्वान याःगु खः। बन्दं यानाः तराई लागाया फुक्क हे जिल्लाय् यातायात, कलकारखाना, शिक्षण संस्था नापं बजाः तकं पूर्ण रुपं ठप्प जूगु दु। थारू कल्याणकारिणी सभाया महामन्त्री राजकुमार लेखीं 'सन्ध्या टाइम्स' लिसे खँ ल्हासें थःपिनि आन्दोलन शान्तिपूर्ण रुपं न्ह्यानाच्वंगु जानकारी बियादीगु दु। वय्कलं यदि शान्तिपूर्ण आन्दोलनय् नं सरकारं दमन यात धाःसा कन्हय् व कंस नं थारुहट-तराई बन्द यायेगु जुइ धकाः ख्याच्वः नं बियादिल। थौं हे सनिलय् छगू पत्रकार सम्मेलन यानाः थःपिनि अवधारणा पित बीगु नापं संघर्षया बारे नं जानकारी बीगु जुइ धकाः लेखीं धयादीगु दु। आन्दोलनया हे झ्वलय् म्हिगः तराईया थीथी जिल्लाय् थारुतय्सं मशाल जुलुस पिकाःगु खः ।

अथे हे ताम्सालिङ राष्ट्रिय दलं थौं ताम्सालिङ बन्द आह्वान याःगुलिं चितवन, धादिङ, मकवानपुर नापं स्वनिगःया जःखः च्वंगु जिल्लाय् जनजीवन प्रभावित जूगु दु। धादिङ जिल्लाय् यातायात ठप्प जूगुलिं येँनं मेगु जिल्लाय् वनीगु नापं मेगु जिल्लां येँय् वनीपिंत तकं प्रभावित जूगु दु ।

बन्द आह्वान यानातःगुलिं हे अन यातायात, बजाः, शिक्षण संस्था, कलकारखाना तकं बन्द जूगु दु। संविधानसभाया राज्य पुनर्संरचना नापं राज्यशक्ति बाँडफाँड समितिं तयार याःगु झिंप्यंगू प्रदेश दुने थरूहट स्वायत्त प्रदेश मदुगु खँय् आपत्ति प्वंकाः थारूत आन्दोलनय् कुहां वयाच्वंगु खःसा व हे प्रतिवेदनय् ताम्सालिङया लागायात मेमेगु प्रदेशय् लाकातःगु खँ न्ह्यथनाः ताम्सलिङ राष्ट्रिय दलं ताम्सालिङ बन्द आह्वान याःगु खः ।

उखे लिम्बुवान परिषदं याःगु बन्दं यानाः पूर्वी नेपाःया जिल्लात नं ठप्प जुयाच्वंगु दु ।