सिद्धान्त मखु, व्यवहारं कम्यूनिष्ट जुइमाः

डी.आर. खड्गी

झीगु जःलाखःला देय् चीन व भारतय् क्रान्ति न्ह्यः देय् तसकं नाजुक जुयाच्वंगु खः। देय् स्यना वनाच्वंगु मू हुनि स्वदेशी सामन्ति व विदेशी विस्तारवाद शक्तिं शोषण यानाच्वंगु खः। सामन्ति शक्तिया चरित्र थःगु स्वार्थ पूर्ति यायेगु खःसा देय्यात बिदेशी शक्तिं बलात्कार याना च्वंसां मुसुमुसु न्हिलाच्वनीम्ह खः। भारत व चीनया छगू जक विदेशी राष्ट्र दुहां वयाः शोषण व सम्पति लुटपाट यानावंगु मखु, यक्व राष्ट्र दुहां वनाः सम्पति लुटे यानाच्वने धुंकूगु खः। भारतय् लिपा वयाः छगू एकलौटी ढंगं शासन यानाः देश व जनतायात कंगाल यानाच्वंगु खः। ब्रिटिस शासकया इलय् नं भारतय् राज्य राज्यया सामन्ति शक्तितय्के अपार धन सम्पति, शक्ति मदुगु मखु, तर इपिं विदेशी शक्तिया न्ह्यःने खिचा थें कय्कुनाच्वनीपिं खः। तःदँ लिपा तिनि त्यागी नेता महात्मा गान्धीया नेतृत्वय् ब्रिटिस सरकारयात असहयोग शान्तिपूर्ण आन्दोलनपाखें बिदेशीतय्त कायल यानाः देशं पितिना छ्वयेत ताःलात। सम्पूर्ण भारतया जनता ब्रिटिस शासकयात असहयोग धकाः राज्ययात कर नं मपुल, प्राकृतिक स्रोतया सम्पति नं ल्हातिइ लाकेत असफल जूगु हुनिं ब्रिटिस सरकार भारत त्वःतेत बाध्य जूगु खः ।

चीनया घटनाक्रम भारत स्वयां अलग्ग प्रकृतिया खनेदु। भारतय् अहिंसा आन्दोलनं विदेशी शक्ति पराजित यायेत ताःलातसा चीनय् बन्दुकया बलं क्रान्ति याःगु खः। चीन नं न्हापा शोषित, पीडित राज्य खः। देशय् सामन्ति शक्ति जक मखु, बिदेशी शक्तिलिसे जानाः अति शोषण यानाच्वंगु खः। जनताया शोषण देशया मुक्तिया नितिं धकाः माओया नेतृत्वय् बन्दुक ल्ह्वंगु खः। चीनया जनमुक्ति सेनाया एकल कुतः जक संघर्ष यानावंगु जूसा सामन्ति शक्ति विदेशी शक्तियात पराजित यायेत असम्भव जुइगु जुइ। माओया दूरदर्शी नेतृत्वं विशेष यानाः स्वंगू खँयात ध्यान तयाः संघर्षय् कुहांवःगु जुयाच्वन। छगू गां गांया सामन्ति शक्तियात माइनस यायां वन। निगू जनताया ग्वाहालि कायेगु निंतिं जनमुक्ति सेनां किसानया दथुइ वनाः दुःख सुखय् ब्वति कयाः किसानयात ल्हातिइ कायेत ताःलात। मेगु खँ पार्टी दुनया जासुसी व पार्टीया व्यक्तिवादी स्वार्थयात नं माइनस यानावने फुगुलिं पार्टी शक्तिशाली जुयाच्वने फुगु खः। चीनया कम्यूनिष्ट पार्टीया मेगु महत्वपूर्ण ज्या थ्व खः। फुक्क जनशक्ति सेनायात बन्दुक चले यायेगु ट्रेनिङ्ग बिउगु जक मखु, सिर्जनशील ज्याया तालिम नं बियावंगु खः। माओं पार्टी कार्यकर्तातय्त कडा आदेश बियादीगु दु कि जनताया मुलु छपु नं सितिं काये मजिउ। जनमुक्ति सेना गां गामय् पार्टीया ज्याय् वन कि गांया जनतां अति हे सत्कार याइगु जुयाच्वन। सत्कार थथे जुयाः याःगु खः कि जनमुक्ति सेनां किसानया बुँज्याय् ग्वाहालि याइगुलिं खः। थुलि जक मखु, जनमुक्ति सेनां किसानयात माःगु तपुलि, लाकां, सुकू थानाः उपहार बियाः लिहां वइगु जुयाच्वन। जनमुक्ति सेनां जनताया निंतिं थज्याःगु महत्वपूर्ण ज्या यानाच्वंसां नं सामन्ति व विदेशी विस्तारवाद शक्ति प्रचार यानाच्वन कि जनमुक्ति सेना धयापिं जनतायात दुःख कष्ट बीपिं डाँकात खः। छगू गामय् विशेष कार्यक्रम ज्वनाः जनमुक्ति सेनाया पुचः वंगु जुयाच्वन। जनमुक्ति सेना अन थ्यने न्ह्यः हे गांया जनतां थःगु गामय् मच्वँसे ग्यानाः बिसिउँवंगु जुयाच्वन। जनमुक्ति सेना स्वन्हु प्यन्हु च्वंतले किसानतय्गु अन्न भकारी लिकयाः भोजन यात। जनमुक्ति सेना लिहां वयेगु दिं कुन्हु किसानतय्गु गुलि नं अन्न तरकारी काःगु खः, उलि हे बराबरया ध्यबा त्वःताः सेना मेगु गामय् वन। गांयापिं जनता लिहां वयाः थःथःगु छँय् दुहां वनाः स्वःगु इलय् ध्यबा तयातःगु खनाः गांया जनता मछाल। व कुन्हुंनिसें सारा जनता जनमुक्ति सेनायात तन, मन व धन बियाः सामन्ति व विदेशी विस्तारवादी शक्तिया विरुद्ध कुहां वयेगु यात। वहे इलय् माओं कोमिङ्गताङ्ग सरकार प्रमुख चाङ्ग काइ सेकनाप सम्झौता यानाः देय्या प्रमुख विस्तारवाद शक्ति जापानिज विरुद्ध कार्यगत एकता यानाः युद्ध न्ह्याकल। जब माओ व च्याङ्ग काइ सेक जाल, जापानीज विस्तारवाद शक्ति देशं पिहां वनेत बाध्य जुल। च्याङ्ग काइ सेकया सेना विदेशी विस्तारवादनाप ल्वायेगु निंतिं माओया सेनानाप जायेगु अवस्था वःगुलिं बाध्य जुयाः माओ पार्टीलिसे च्याङ्ग काइ सेकं सम्झौता यायेमाःगु खः ।

फागुन २४ गते शताब्दीयौं अन्तर्राष्ट्रिय महिला दिवसया दिं कुन्हु एनेकपा (माओवादी) पार्टीया नेता प्रचण्डं न्हापा न्हापा थें नेपाली सेनालिसे त्रुद्ध मजुसे सेनाप्रति अति नरम जूगु संकेत बियादिल। प्रचण्डं भाषण बीगु झ्वलय् नेपाली सेना देय् रक्षा यायेत च्वनाच्वंपिं खः। सेना सुं ब्यक्ति वा पार्टीया स्वार्थय् वफादार मजू धयागु क्यनेधुंकल। जुजु ल्यंका तयेत कुहां मवः धाःसा कांग्रेस व एमालेया स्वार्थया निंतिं सेना कुहां वइ मखु धइगु विश्वास दु धयादिल। अथे जूगुलिं नेपाली सेना व जनमुक्ति सेना जानाः देशया सार्वभौम अखण्डता रक्षाया निंतिं न्ह्यःने वनेमाल धकाः आह्वान यानादिल। नागरिक सर्वोच्चता, देशय् अमन चयन, शान्ति हयाः देय् विकासया निंतिं नं सेनां महत्वपूर्ण भूमिका म्हितेत आह्वान यानादिल। माओवादी पार्टी राष्ट्रभक्त लाइनय् वयाच्वंगु अति सकारात्मक जू। माओवादी पार्टीं म्हुतुं देय्या सेवक धायेगु स्वयां नं व्यवहारं देश सेवक पार्टी खः धकाः क्यनेमाःगु अति आवश्यक दु। वास्तवय् कम्यूनिष्ट पार्टी धयागु राष्ट्र व जनताया सेवा याइपिं खः। पार्टी सिद्धान्तया खँ ल्हायेगु म्हो यानाः ब्यवहारं सच्चा कम्यूनिष्ट धकाः क्यने फत धाःसा जक जनतां विश्वास यायां वनी। यदि माओवादी पार्टीं चकंगु नुगलं जनताया सेवक खः व विदेशी शक्तिया प्रभावं मुक्त यायेगु निंतिं संघर्षय् कुहांवल धाःसा नेपाली सेना जक मखु, सारा जनतां ग्वाहालि बी ।

More Stories Like this