वइन - "माया"

नेपालभाषाय् मेगु छगू न्हूगु संकिपा "माया" वइगु जूगु दु । बिहिबाः येँया साय्प फल्चाय् छगू ज्याझ्वःया दथुइ थुकिया शुभमुर्हूत जूगु दु । ज्याझ्वलय् कवि दुर्गालाल, म्ये हालामि भृगुराम, ख्यालिजुजु मदनकृष्ण श्रेष्ठ, नविन सुब्बा आदि पाहांपिन्सं संकिपाया सफलताया कामना यानादीगु खः । लिसें मदनकृष्णं थुगु हे संकिपाय् दुथ्याइगु "राजमति व छि ला छुं हे मपाः रे" म्ये नं न्याकादीगु खः ।

हस् प्रोडक्सनया ब्यानरय् निर्माण जुइगु थुगु संकिपा आर्यम नकःमिया लेखन अले आर्यम व सुनिता राजभण्डारीया निर्देशनय् तयार जुइत्यंगु खः । थुकिइ आर्यम नकःमि, स्लेशा श्रेष्ठ, मदनदास श्रेष्ठ, गणेशराम लाछि, शकुन्तला राजकर्णिकार, स्वतन्त्र संसार महर्जन, श्रनिता राजभण्डारी, हरीमान दिवाकर, विकास डंगोल, कृष्णभक्त महर्जन, दीपक तुलाधर, कंचन तुलाधर मू भूमिकाय् व भृगुराम श्रेष्ठ, भिंतुना जोशी व सुरेन्द्र महर्जन पाहां भूमिकाय् खनेदइ ।

सुमन महर्जनया छाँयाकन, दीपेन बस्न्यातया सम्पादन जुइगु थुगु संकिपाय् दुर्गालाल व मदनकृष्ण श्रेष्ठया गीत रचना, मदनकृष्ण श्रेष्ठया संगीत व भृगुराम, मदनकृष्ण सुमन कपाली व रत्नशोभा महर्जनया गायन नं दुथ्याइ ।

"समस्तय् माया गज्याःगु संकिपा जुइ ?", " माया छगू काल्पनिक बाखनय् आधारीत संकिपा खः । थुकिइ जातिय भेदपाखें बायाच्वंगु छगू अवोध मतिनाया बाखं दु" - 'माया'या निर्देशक सुनिता राजभण्डारीं नेपालमण्डलयात कनादिल ।

More Stories Like this