हिन्दु राष्ट्रवाद संघीयता विरुद्ध ग्रायण्ड डिजाइनः प्रचण्ड
येँ (सन्ध्या टाइम्स)/प्रमुख प्रतिपक्ष दल एनेकपा (माओवादी)या नायः प्रचण्डं आःया अवस्थाय् हिन्दु राष्ट्रवाद धकाः थीथी ख्यलं म्हिताच्वंगु भूमिका धइगु संघीयता विरुद्ध ग्रायण्ड डिजाइन खः धयादीगु दु ।
म्हिगः यलया एकान्तकुना लागाय् द्वलंद्वः माओवादीया नेवाःराज्य समितिया जिल्ला दुजःतय्त प्रशिक्षण बीगु झ्वलय् प्रचण्डं थ्व खँ धयादीगु खः। गबलें काली बाबाया नामं गबलें छुं पार्टीया नामं अले गबलें पुलांम्ह जुजुया नामं गुगु कथं हिन्दु राज्य घोषणा यायेमाः धकाः खँ हयाच्वंगु दु व फुक्कं हे संघीयता विरुद्ध नियोजित डिजाइन जूगु नं वय्कलं धयादिल ।
नेपालय् धार्मिक खँ हयाः साम्प्रदायिक ल्वापु याकेगु नापं मनूतय्त विचार शुन्य यानायंकेगु षडयन्त्र कथं हे धर्मनिरपेक्ष राज्य घोषणा जुइ धुंकूगु थ्व अवस्थाय् नं हिन्दु राष्ट्रया खँ पित हयाच्वंगु खः धकाः नं माओवादीया नेता प्रचण्डं धयादिल ।
वय्कलं लिपांगु इलय् वयाः संचार माध्यमं नं माओवादी पार्टी प्रति नकारात्मक खँ जक प्रचार यायेत व नापं माओवादी नं मेमेगु पार्टी थें जक खः धकाः जनतायात भ्रमय् लाकेत स्वयाच्वंगु दु धासें व पाखें सचेत जुयाः न्ह्याः वनेत कार्यकर्तातय्त निर्देशन नं बियादिल। उगु प्रशिक्षण ज्याझ्वलय् ब्वति कयादीम्ह छम्ह माओवादीया नेतां 'सन्ध्या टाइम्स' यात कनादी कथं माओवादी पार्टीया नायः जुयाः नं थम्हं मेय् पूजा यात धकाः गुगु कथं प्रचारवाजी यात उकिंयाना माओवादीया नेतातय्त हे भ्रम ब्वलंकूगु दु धकाः नं न्ववानादीगु खः। अथे हे गुलिं गुलिं संचार माध्यमं ला चान्हय् चान्हय् प्रंचण्डं कालीवावायात नापलात धकाः म्वाः मदुगु खँ तकं पित हयाच्वंगु दु धासें आःया इलय् माओवादीयात स्यंकेत प्यखेरं डिजाइन जुयाच्वंगुलिं सकलें सचेत जुयाः वनेत निर्देशन नं बियादिल ।
नेता प्रचण्डं माओवादी पार्टीं कम्युनिष्टतय्गु छगू केन्द्र दयेकेगु कथं थःपिं न्ह्याः वनाच्वनागु नापं छुं दिं लिपा हे मेमेगु पार्टीया नेता व कार्यकर्तात माओवादीलिसे एकता यायेत वयेत्यंगु दु धकाः नं कनादीगु खः ।
