अनमिनया विरोध, भारतयात निमन्त्रण

नेपाःया शान्ति प्रक्रियाय् ग्वाहालि यायेत नेपाः वयाच्वंगु राष्ट्र संघीय मिसन अनमिन व नेपाः सरकार दथुइ आः वयाः खुल्ला 'युद्ध' हे शुरु जूगु आभास ब्वलंगु दु। खास यानाः नेपाः सरकारं माओवादी लडाकुया पाय्छि ल्याः थःपिंत माल धकाः याःगु मागयात अनमिनं अस्वीकार यायेवं सरकारं अनमिन विरुद्ध 'जेहाड' शैलीं हे आक्रमण शुरु याना हःगु दु। थुकिं यानाः अनमिन व सरकार दथुया गाः अझ तःधं जुयावंगु दुसा थ्वहे गाः चीधं यायेगु ताः तयाः राष्ट्र संघया राजनीतिक मामिला सम्बन्धी उपमहासचिव बिलिन पास्को नेपाः झाःगु खः। वय्कलं देय्या थीथी दलया नेतात नापलानाः थ्वहे विषयय् बिचाः ब्याकादीगु दु ।

खतुं अनमिनया भूमिका नेपालय् आशा याना ति सन्तुलित व क्वातु मजू। अनमिनया पदाधिकारी नापं कर्मचारीतय् चहपहलं नं थ्व खँ पुष्टि जू। तर अज्याःगु छुं गल्ती कमजोरीयात नेपाः सरकारं धाःसा अक्षम्य गल्ती कथं परिभाषित यायेत स्वयाच्वंगु खनेदु। थ्व नेपाःया मेगु गल्ती खः। नेपाः सरकारं अनमिनयात थज्याःगु मिखां स्वया हःगु धइगु वास्तवय् भारतया दवावं यानाः खः धइगु खँ नं सुंपाखें सुलाच्वंगु मदु। नेपालय् अनमिनया उपस्थित दुगु कारणं थन भारतं प्रत्यक्ष ल्हाः तये मखनाच्वंगु दु। उकिं अनमिन नेपालय् वयाच्वंगु भारतयात मयः। छुं जुयाः नेपालय् अनमिनयात निषेध यात धाःसा थन तप्यंक भारतं ल्हाः तयेगु कुतः याइ। नेपालय् भारतया गुलि क्वातुगु प्रभाव दु धइगु खँ स्वय्म राष्ट्र संघं नं भारतलिसे सल्लाह मयासे नेपालय् छुं नं ज्या मयाःगुपाखें नं सीदु। वास्तवय् भारतया प्रत्यक्ष प्रभावयात पनेगु निंतिं नं थ्व इलय् अनमिन मालाच्वंगु दु ।

More Stories Like this