अनमिन लित छ्वयेगु कुतः
'लडाकूया ल्याः गोप्य तयेगु हे सहमति दु'
येँ (सन्ध्या टाइम्स)/वर्तमान सरकारं माओवादीया पँ लिउगु धइगु द्वपं बियाः संयुक्त राष्ट्र संघीय मिसन अनमिनयात लित छ्वयेगु तयारी शुरु याःगु खँ सीदुगु दु ।
म्हिगःनिसें नेपाः भ्रमणय् झायाच्वंम्ह राष्ट्र संघीय राजनीतिक मामिलाया उप महासचिव बिलिन पास्कोया पुचलं थःपिंत अथे महसुस जुयावःगु दु धकाः नागरिक समाजया छम्ह न्ह्यलुवायात कनादीगु खः ।
भारतय् निन्हु च्वनाः नेपाः वयेगु झ्वलय् नापलाःम्ह नागरिक समाजया छम्ह न्ह्यलुवायात वय्कःपिंसं थ्व बिचाः प्वंकादीगु खः ।
वर्तमान सरकारं अनमिनयात थीथी कथंया द्वपं बियाः लित छ्वयेगु तयारी यानाः गोप्य सम्झौताया उल्लंघन जुइकथंया ज्या न्ह्याकाच्वन धइगु खँ नं थुथाय् पिहां वःगु खँ सूत्रं धाःगु दु ।
न्हापा जूगु सहमति कथं सेना समायोजनया सवालय् माओवादी लडाकु गुलि दु धकाः गोप्य तयेमाःगु खः तर सरकारं उकियात हाचांगायाः सम्झौतायात हे उल्लंघन यासें माओवादी लडाकुया ल्याः माग यानाच्वंगु, सम्झौताया अःखः नेपाली सेनायात ब्यारेकय् मतसे पिने हयाच्वंगु व सेनाय् न्हू भर्ना कयाच्वंगु नं शान्ति सम्झौतायात भंग यायेगु कथंया कुतः खः धकाः नं वय्कलं तायेकादीगु खँ सूत्रं धाःगु दु ।
सरकारं थौंकन्हय् धया हःगु 'छम्ह लडाकु व छपु ल्वाभः' धइगु खँ सम्झौताय् मदुगु जानकारी नं उमिसं बिउग दु।
थम्हं भारतया सरकारी अधिकारीतय्त नापलानाः सहलह ब्याकागु इलय् उमिसं माओवादीत बहुदलीय संसदीय व्यवस्थायात स्वीकार यानाः मुलधारया राजनीतिइ वइ धकाः भारतं विश्वास मयाःगु खँ सीदत धकाः नं वय्कलं कनादीगु खः। माओवादीत हाकनं सशस्त्र संघर्षय् लिहां वनी मखुत धकाः भारतं अझ नं पत्याः मयाःगु व भारतं चाहना मयायेकं नेपाःया शान्ति प्रक्रिया निष्कर्षय् थ्यंके फइगु अवस्था मदु धकाः नं वय्कलं कनादीगु खः ।
नेपाःया आःयापिं मन्त्रीतय्सं माओवादीयात गुगु द्वपं बियाच्वंगु खः नापं माओवादी सेनायात कयाः गुगु धयाच्वंगु खः, भारतीय अधिकारीतय्सं नं पाय्छि अथे हे धायेगु यानाच्वंगु खँ नं भाजु पास्कों कनादिल ।
