फुक्क पार्टीयात गाडीया सुविधा

प्रधानमन्त्री माधव नेपालया नेतृत्वय् दुगु वर्तमान सरकारं संविधानसभाय् दुथ्याःगु २५ गुलिं पार्टीया नेतायात गाडी सुविधा बीगु धकाः निर्णय यानाः राष्ट्रिय धुकुती मेगु छगू प्वाः खना बिउगु दु। प्रधानमन्त्री नेपालया सरकारं याःगु थ्व निर्णय संविधानसभाय् दुथ्याःगु पार्टीतय् आवश्यकता स्वयां नं थःगु सरकार टिके यायेत ल्ह्वंगु मेगु छगू आत्मघाती पलाः जक खः ।

नेपाःया आर्थिक अवस्था गुलि ग्यानापुगु स्थितिइ ध्यनेधुंकल धइगु खँ आः सुनां नं कनाच्वने माःगु विषय मखये धुंकल। थज्याःगु अवस्थाय् देय्या धुकू बल्लाकेगु मस्वये सरकार टिके यायेगु नामय् लाःलाथे दां खर्च याना जुइगु अधिकार थ्व सरकारयात कदापी मदु। खतुं संविधानसभाय् दुथ्याःगु फुक्क हे दलयात गाडी सुविधा बीगु थ्व निर्णय पुलांगु माओवादीया सरकारं हे याना तःगु खः। यद्यपि अबलय् थ्व निर्णय लागू मजुल। यदि जूगु जूसा माओवादीया सत्तालोलुप ख्वाःपाः अबलय् हे पिलुइगु खः। अबलय् कार्यान्वयन याये मजिउ धकाः थानाच्वंगु ज्यायात पुलांगु हे सरकारया निर्णय खः धकाः लागू यायेगु धइगु सरकारया मेगु निर्लज्जता खः। पुलांगु सरकारं थ्व जक मखु मेमेगु नं जनताया हीत जुइगु निर्णयत यानातःगु दु। सरकारं उकियात कार्यान्वयन मयासे थ्वहे निर्णय छगू जक छाय् कार्यान्वयन याये माल? थ्व थम्हं गल्ती यानाः दोष फुक्क कर्पिनि कपालय् दिकेगु औसत नेपाली मानसिकताया प्रदर्शनी जक खः। सरकारया थ्व निर्णययात गुलिखे इमान्दार पार्टीतय्सं बहिष्कार यायेगु धकाः नं निर्णय यायेधुंकूगु दु। थज्याःगु फजुल खर्च जुइगु ज्या सरकारं नं तुरुन्त लित कायेमाः ।

More Stories Like this