मलेशियां लिहां वइपिंत क्षतिपूर्ति

फुसा मेगु देशय् छ्वयेगु बारे अध्ययन

विश्व आर्थिक मन्दीपाखें प्रभावित देशय् ज्या मदयाः दछि दुने हे लिहां वइपिं नेपाःमि ज्यामितय्त नेपाः सरकारं क्षतिपूर्ति स्वरुप उमिसं विदेश वनेत याःगु कूल खर्चया छुं प्रतिशत दां लित बीगु जूगु दु । आः नकतिनि च्वंगु वैदेशिक रोजगार पर््रवर्द्धन बोर्डं थुकिया निंतिं सरकारयात सिफारिस याःगु खः । उगु सिफारिसय् धयातः कथं विदेश वनाः खुलाया दुने हे लिहां वःपिं ज्यामियात उमिसं पूगु दांया ४० प्रतिशत व दछिया दुने लिहां वःपिं २५ प्रतिशत दां लित बीगु व्यवस्था यायेत्यंगु दु । बोर्डपाखें थौं सरकारयात थुकिया औपचारिक आग्रह यायेगु व सरकारं नं थनिंनिसें हे लागू जुइ कथं थ्व व्यवस्था याइगु खँ धाःगु दु । सरकारं थ्व ध्यबा कल्याणकारी कोषय् मुनाच्वंगु दांपाखें बी । उकी १३ करोड दां दु ।

आः नकतिनि मलेशिया सरकारं थःगु देशय् विदेशी ज्यामितय् ल्याः क्वपालेगु धकाः याःगु घोषणां नेपाःमि ज्यामित नं प्रभावित जुइगु जूगुलिं नेपाः सरकारं थ्व तयारी याःगु खः । मलेशिया लगायत आर्थिक मन्दीं प्रभावित मेमेगु देशं लिहां वइपिं नेपाःमि ज्यामितय्त थ्व क्षतिपूर्ति दइ ।

उखे श्रम मन्त्री लेखनाथ भट्टं म्हिगः रिपोर्र्टर्स क्लबय् न्ववासें छुं जुयाः मलेशियां नेपाःमि ज्यामित लिहां वल धाःसा उमित मेगु देशय् छ्वयेगु बारे सरकारं बिचाः याना-च्वंगु खँ कनादीगु दु । मलेशियाय् आःयात उत्पादन व सेवा क्षेत्रया ज्यामि जक क्वपालेगु धाःगुलिं नेपाःमि ज्यामित आँटे चायेमाःगु आवश्यकता मदुगु खँ नं वय्कलं कनादिल । नेपाःया ज्यामित दकलय् अप्वः वनीगु देय् कतार खःसा निगूगुली मलेशिया लाः । निदँ न्ह्यः तक अन वनीपिं नेपाःमितय् ल्याः दछिया ८० हजार दुगु खःसा आः कुहां वयाः ५० हजार थ्यनाच्वंगु दु । मलेशियाय् २० लाख एशियाली मूलया ज्यामित दुगुली ४ लाख नेपाःमि दु । अनया सरकारं जनवरीया अन्त तकया दुने ४५ हजार विदेशी ज्यामि क्वपालेगु घोषणा यायेधुंकूगु दु । मलेशियाया थ्व घोषणा लिपा नेपालं मलेशिया वनेगु लागिं तयारी यानाच्वंपिं सलंसः ज्यामितय् प्रक्रिया रोके जूगु दु । विश्वन्यंकं करिब २५ लाख नेपाःमि ज्यामित दु धइगु अनुमान दु ।