गृह राज्यमन्त्रीया राजीनामा

प्रमयात गृहमन्त्रीया दवाव / 'सुरक्षाया ग्यारेन्टी मंत'

येँ (सन्ध्या टाइम्स)/देशय् गृहमन्त्रीं बांलाक शान्ति सुरक्षा बी मफुगु कारण क्यँसें गृह राज्यमन्त्री मोहम्मद रिजवान अन्सारीं थौं थःगु पदं राजीनामा बियादीगु दु। च्याला न्ह्यःनिसें गृहमन्त्रीलिसे कचमच जुयाच्वंम्ह राज्यमन्त्री अन्सारीं 'शान्ति सुरक्षाय् सुधार जुइगु लक्षण खने मंत, उकिं राजीनामा बी त्यना' धकाः धयादीगु दु ।

थ्वसिबें न्ह्यः वय्कलं सुरक्षा व्यवस्था भिंके मफुत धाःसा झिंन्यान्हुया दुने राजीनामा बी धकाः सार्वजनिक रुपं धयादीगु खः ।

संचार उद्यमी जमीम शाह व अरुण सिंहानियाया हत्या लिपा हे गृह राज्यमन्त्री अन्सारीं सार्वजनिक रुपं हे गृहमन्त्री भीम रावलयात नैतिकताया आधारय् राजीनामा बीत इनाप यानादीगु खः। तर रावलं उगु इनापयात वेवास्ता याःगु जक मखु थःत अज्याःगु इनाप याइम्ह राज्यमन्त्रीयात सरकारं चीकेमाः धकाः प्रधानमन्त्रीयात दवाव समेत बिउगु खँ सूत्रं धाःगु दु। वर्तमान सरकारय् एमालेपाखें वनाच्वंपिं प्रधानमन्त्री लगायत झिम्ह मन्त्रीत मध्ये गृह राज्यमन्त्री अन्सारी छम्ह हे जक चुनावय् प्रत्यक्ष त्याना वःम्ह खः। वय्कः सर्लाही २ पाखें त्याना वःम्ह खः। गृहमन्त्री रावल व राज्यमन्त्री अन्सारी निम्हं एमालेया मन्त्रीत खः ।

सूत्रं बिउगु जानकारी कथं छुं दिं न्ह्यः तिनि गृहमन्त्री रावलं 'राज्यमन्त्री अन्सारीं जितः न्ह्यःने लाःथे धाल उकिं जिपिं निम्हं छगू हे थासय् च्वने फइ मखु। कि अन्सारीयात चीकि, कि जिं हे राजीनामा बी' धकाः प्रधानमन्त्रीयात ख्याच्वः बियादीगु खः। गृहमन्त्रीपाखें थज्याःगु ख्याच्वः वयेवं प्रम नेपालं म्हिगः बहनी राज्यमन्त्री अन्सारीयात वालुवाटारसःताः राजीनामा बीत इनाप यानादीगु खः। राज्यमन्त्री अन्सारी पार्टी अध्यक्ष झलनाथ खनाल पक्षधर खःसा गृहमन्त्री रावल ओली पक्षधर खः ।