इहिपाः जूथाय् गोली चले जुल
निम्ह सित,प्रदर्शन यानाः चक्का जाम
येँ (सन्ध्या टाइम्स)/सिराहाया मझौलिया गाविस वडा नं. ६ लागाय् वंगु चान्हय् इहिपाः जुयाच्वंगु थासय् हे म्हमसिउपिं मनूतय्सं न्ह्यःने लाःथे गोलीं कयेकाः छम्ह मचा नापं निम्हेसित स्याना बिउगु दु ।
उगु गोली काण्डय् लानाः मझौलिया गाविस वडा नं. ७ या झिंनिदँ दुम्ह मचा जितेन्द्र भण्डारी व मिर्चैया गाविस वडा नं. २ या नीनिदँ दुम्ह दिलीप साह सीगु दु ।
गोलीं कयाः घाःपाः जूम्ह भण्डारीयात मिर्चैया अस्पताल यंकाच्वँच्वं लँय् हे मदुगु खः। गोलीं कयाः घाःपाः जूम्ह मेम्ह साहयात नं विराटनगर अस्पतालपाखे यंकाः च्वँच्वं लँय् हे सीगु खः धकाः अनया प्रहरीं धाःगु दु। स्थानीय आरङ नांगु गांया रामप्रित ठाकुरया इहिपाः जुयाच्वंगु थासय् आकाझाकां म्हमसिउपिं मनूत वयाः गोलीं कयेकाः बिसिउँ वंगु खः। उगु घटनाय् स्वापू दुपिंत प्रहरीं मालेगु ज्या यानाच्वंगु दुसां थौं सुथय् तक नं मनूत धाःसा लुइके फुगु मदुनि। अथे इहिपाः जुयाच्वंगु समारोहय् हे म्हमसिउपिं मनूतय्सं गोलीं कयेकाः स्याना बिउगु विरोधय् स्थानीय मनूत नापं सीपिनि छेँजःपिंसं थौं सुथंनिसें हे पूर्वपश्चिम राजमार्ग अन्तर्गत मिर्चैया लागाय् विरोध प्रदर्शन यानाच्वंगु दु ।
अपराधीतय्त ज्वनाः तत्काल हे कारवाही यायेमाःगु, शान्ति सुरक्षाया व्यवस्था यायेमाःगु, सीपिनि छेँजःपिंत सरकारं क्षतिपूर्ति बीमाःगु मागयाना थौं सुथंनिसें अन प्रदर्शन याना चक्का जाम यानाः यातायात ठप्प यानाच्वंगु दु ।
उगु घटनायात कयाः गांयापिं मनूत छप्पँ जुयाः यक्व हे ल्याखय् सतकय् कुहां वयाच्वंगु दुसा प्रहरीं धाःसा अपराधी मालेगु निंतिं अनुसन्धान जुयाच्वंगु खँ सरोकारवालापिन्त धयाच्वंगु दु। अप्रिय घटना मजुइमा धकाः अन प्रदर्शन यानाच्वंगु थासय् व्यापक प्रहरी परिचालन यानातःगु दु ।
