बैशाख १४ गते नेवाःतय्सं संविधानसभा घेरे याइगु
येँ (सन्ध्या टाइम्स)/स्वनिगःया आदिवासी नेवाःतय्सं न्हापांखुसी संविधानसभा घेराउ यायेत्यंगु दु। नेवाः स्वायत्त राज्य मंकाः संघर्ष समितिया आह्वानय् बैशाख १५ गते न्हूबानेश्वरया संविधानसभा भवन घेराउ याइगु जूगु दु ।
न्हूगु संविधान जारी यायेगु धकाः क्वःछिनातःगु ई लछि जक ल्यं दनिगु अवस्थाय् नेवाःतय्सं थःपिनिगु अग्राधिकार नापं नेवाः स्वायत्त राज्य सुनिश्चित यायेमाःगु, जातीय स्वशासन नापं आत्मनिर्णयया अधिकार दयेमाःगु, एतिहासिक नेपालमण्डलया नेवाः बाहुल्यता दुगु लागायात नेवाः स्वायत्त प्रदेशय् दुथ्याकेमाःगु नापं थीथी कथंया माग यासें संविधानसभा घेराउ यायेगु खँ क्वःछिउगु खः ।
वंगु छुं दिं न्ह्यः जक च्वंगु मंकाः संघर्ष समितया मुँज्यां बैशाख १४ गते छगू जुलुस सहित वनाः संविधानसभाया भवन घेराउ यायेगु खँ क्वःछिउगु जानकारी मंकाः संघर्ष समितिया दुजः नरेन्द्रभक्त हाडां बियादीगु दु ।
कन्हय् नागरिक खबरदारी सभा
येँ (सन्ध्या टाइम्स)/क्वःछिनातःगु इलय् हे अग्रगामी नापं मानवअधिकारसम्मत संविधान जारी यायेमाःगु माग यासें आन्दोलन याना वयाच्वंगु लोकतन्त्र व शान्तिया निंतिं नागरिक आन्दोलनं कन्हय् संविधानसभा भवन न्ह्यःने खबरदारी नागरिक सभा यायेत्यंगु दु ।
न्हिनय् २ बजेनिसें न्ह्याइगु उगु सभाय् नागरिक आन्दोलनया न्ह्यलुवातय्सं न्ववायेगु नापं कलाकारतय्सं सांस्कृतिक ब्वज्या नं याइगु ग्वसाः दु। उगु हे सभां नागरिक आन्दोलनया न्हूगु चरणया दबावमुलक संघर्षया ज्याझ्वः नं घोषणा याइगु जूगु दु। न्हूगु घोषणा याइगु ज्याझ्वः कथं जिल्ला जिल्लापाखें सहभागिता याकाः निरन्तर धर्ना च्वनेगु जुइ धकाः आन्दोलनया न्ह्यलुवा डा. देवेन्द्रराज पाण्डें धयादीगु दु।
