विश्व नेवाः संगठन स्वनेगु ऐतिहासिक कुतः

नेपाः दुने च्वंपिं जक मखु विश्वया हे थीथी थासय् च्वनाच्वंपिं नेवाःतय् लागिं छगू लसताया खँ जूगु दु - विश्व नेवाः संगठन दयेकेगु तयारी। आःयात अमेरिकाय् च्वनाच्वंपिं छुं नेवाः कार्यकर्तात जानाः न्ह्याकूगु थ्व ज्यां विश्वया फुक्क हे नेवाःतय्त छपाः हे कुसा क्वय् हयाः बल्लाकेगु ताः तःगु दु। थ्व तसकं च्वछायेबहःगु ज्या खः। थुकिं नेपालय् च्वनाच्वंपिं जक मखु विश्वया फुक्क हे देशय् च्वंपिं नेवाःतय्त उत्साहित याना बिउगु दयेमाः। थौं विश्व गुगु रुपं विकास जुजुं वनाच्वंगु खः, अले नेवाःत थीथी कारणं विश्वन्यंकं गुगु रफ्तार न्यना वनाच्वंगु खः, उकियात वाःचायेकाः नं थज्याःगु छगू मंकाः कुसा दयेकेमाःगु खँयात ताः ई न्ह्यवंनिसें वाःचायेका हयाच्वंगु खः। थौंया मनूत दूरीया ल्याखं न्हय्गू समुद्र पारी च्वंम्ह खःसां प्रविधिं उमित थःगु हे छेँया जःलाखःला स्वयां नं सतिक तया तःगु दु। उकिं विश्वन्यंकंया नेवाःत गय् यानाः छथाय् च्वने फइ धकाः न्ह्यसः तयाच्वनेमाःगु शायद आवश्यकता मदु। तर संगठन धायेधुंकल कि उकियात मात्र छगू सुविधासम्पन्न प्रविधि दुने जक सीमित याना तयेगु धाःसा उचित मखु। उकियात महसुस याये फइगु भौतिक रुप नं बीमाःगु आवश्यक जुइ। थौंया ई नेवाःतय्त आर्थिक रुपं नं सम्पन्न यानाः न्ह्यःने यंकेगु ई खः। संघीय व्यवस्था अन्तर्गत नेवाःतय्गु बिस्कं राज्य दइबलय् अन उद्योग, रोजगारी, व्यापार, व्यवसाय फुक्कया उपलब्धता गय् यानाः चूलाकेगु खः उखेपाखे थज्याःगु संस्था न्ह्यचिल धाःसा उकिया सार्थकता अप्वः दइ। नेवाःतय्त धाथें छधी यायेगु मू लँपु नं थ्वहे खः। विश्व नेवाः संगठन ताःलायेमा धकाः झीसं कामना याये ।

More Stories Like this