विश्व नेवाः संगठन गठन यायेगु तयारी न्ह्यात

नेपाः व नेवाः मू लक्ष्य

येँ (सन्ध्या टाइम्स)/नेपालय् वयेत्यंगु संघीय व्यवस्था अन्तर्गत बल्लाःगु नेवाः स्वायत्त राज्य प्राप्त यायेगु आन्दोलनयात तिबः बीत व वयां लिपा नेपाःया नेवाः जनतायात हरेक कथंया ग्वाहालि चूलाकेत धइगु ताः तयाः 'विश्व नेवाः संगठन (वर्ल्ड नेवाः अर्गनाइजेशन)' चायेकेगु तयारी शुरु जूगु दु ।

विश्वया थीथी देशय् छरे जुयाच्वंपिं नेवाःत मुनाः थुगु विश्व नेवाः संगठन चायेकेगु तयारी न्ह्याःगु खः। थुकिया निंतिं आः थथें छगू तदर्थ समिति दयेकाः ज्या यायेगु व दछिया दुने विधान तयार यानाः पूर्ण कमिटीं ज्या न्ह्याकेगु सांगठनिक तयारी नं न्ह्यःने यंकाच्वंगु खँ सीदुगु दु ।

संगठन चायेकेगु लागिं अमेरिकाय् च्वनाच्वंपिं छपुचः नेवाः कार्यकर्तात सक्रिय जुयाच्वंगु दुसा वय्कःपिंसं थुकिया लागिं विश्वया थीथी थासय् च्वनाच्वंपिं नेवाःतय्त स्वापू तयाः विश्व नेवाः संगठन सम्बन्धी बिचाः कायेगु ज्या यानाच्वंगु दु ।

विश्व नेवाः संगठन चायेकेधुंकाः नेपाःया नेवाःतय्त ग्वाहालि यायेगु ताः तयाः 'विश्व नेवाः कोष' नं चायेकेगु उद्देश्य थ्व पुचलं तःगु दु। थ्व कोषं नेवाःतय् सामाजिक, सांस्कृतिक विकास जक मखु आर्थिक विकास यायेगु समेत ताः तयातःगु दु ।

पुचःपाखें विश्व नेवाः संगठन स्वनेमाःगु कारण व थुकिया उद्देश्य न्ह्यथनाः छगू अवधारणा नं दयेका तःगु दुसा आःयात थ्वहे अवधारणा न्ह्यःने तयाः बिचाः कायेगु व इच्छुकपिनि नां मुंकेगु ज्या न्ह्याकाच्वंगु दु ।

विश्व नेवाः संगठनया तदर्थ समिति दयेकेगु लागिं उकी च्वनेत इच्छुकपिनि नां मुंकेगु ज्या पुचलं यानाच्वंगु दुसा तदर्थ समितिया प्रत्येक दुजः संगठन निर्माणप्रति धाथें इमान्दार जुइमा धकाः ५०० डलर 'शिड मनी' या रुपय् हापं तयेमाःगु व्यवस्था नं याःगु दु ।

थुगु संगठनं थीथी देय्या नेवाः संगठनयात कचाया रुपय् विकास यानाः उकिया मू ज्याकू धाःसा नेपालय् तयेगु सोच दयेकाच्वंगु दु। आः थुगु संगठनय् च्वनेगु निंतिं अमेरिका लगायत बेलायत, जापान, क्यानाडा, संयुक्त अरब इमिरेट्स, अष्टेलिया, हंगकंग, बेल्जियम, स्वीट्जरल्याण्ड, थाइल्याण्ड व भारत (सिक्किम) पाखें नां वयेधुंकूगु दु ।

संगठनं नेपाः व नेवाःयात हे थःपिनि लक्ष्य धाःगु दु। संघीय नेपाःया प्रस्तावित नक्सा धकाः पिहां वःगु न्हूगु नेपाःया खाकाय् ५.६ प्रतिशत जनसंख्या दुपिं नेवाःतय् लागिं २ प्रतिशत जक भूमि बिउगु खँय् विश्वन्यंकंया नेवाःत आक्रोशित जुयाच्वंगु दुसा नेवाःतय् लागिं थप भूमि कायेगु लागिं अझ संघर्ष यायेमाः धकाः नेपाःया नेवाः न्ह्यलुवातय्त आह्वान नं यानाच्वंगु दु ।