सत्ता चुनावं मखु बन्दूकं हे प्राप्त जुइगु खःला?
नेपाःया आन्तरिक समस्या समाधान यायेगु धकाः थन वयाच्वंम्ह भारतीय कम्युनिष्ट पार्टीया नेता सिताराम यचुरीं नेपालय् चुनाव त्याकाः दकलय् तःधंगु दल जुइत ताःलाःसां नं माओवादीत सत्तां पिने लानाच्वंगु कारणं भारतीय माओवादीत राजनीतिया मुलधारय् वयेत ग्यानाच्वन धकाः यानादीगु विश्लेषण अतिकं यथार्थवादी जू। माओवादी धइपिं 'सत्ता बन्दूकया नालं प्राप्त जुइ' धइगु धापूयात विश्वास याइपिं राजनीतिक प्राणी खः। नेपाःया माओवादीत अज्याःगु विश्वासयात त्वाःथलाः सत्ता जनताया मतपाखें नं प्राप्त जुइफु धइगु न्हूगु विश्वास ज्वनाः मुलधारय् कुहां वःपिं खः। तर जनताया अत्यधिक मत प्राप्त जुलं नं सत्ता धाःसा प्राप्त मजूगु कारणं सत्ता प्राप्तीया लागिं बन्दूकया नाल बाहेक मेगु लँपु हे मदु धइगु पुलांगु विश्वासय् लिहां वनीगु खतरा उतिकं दु। अय् जूगुलिं नेपाःया माओवादीत चुनावपाखें तःधंगु दल ठहर जुलं नं सत्ताय् मथ्यंगु खनाः भारतीय माओवादीत थारान्हुयाच्वन धकाः यचुरीं यानादीगु विश्लेषण स्वाभाविक खनेदु। कन्हय् थ्वहे विश्लेषण नेपाःया माओवादीं नं याना हल धाःसा अबलय् उपिं हानं नं सत्ता प्राप्तीया लागिं बन्दूकया नालपाखे हे फस्वः मवनी धकाः धाये फुगु अवस्था मदु। आः हे नं माओवादी दुनेया गुलिखे कडा बिचाःया नेतातय् बिचाः न्यनेगु खःसा माओवादी पुलांगु लँपुइ लिहां वनी ला धकाः ग्यायेमाःगु अवस्था दु। उकिसनं नेपाःया वर्तमान संक्रमण अवस्था, देय्यात आवश्यक जुयाच्वंगु राष्ट्रिय सहमति आदि फुकयात ध्यानय् तयेबलय् चुनावं तःधंगु शक्ति ठहर जूगु पार्टी सत्तां पिने लाइगु स्वस्थकर खने मदु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
