उपन्यास ब्वनाः सिरपाः त्याकादिसँ

सुरेश

साहित्यय् छगू न्हूगु प्रयोग

ख ला उबलय् मथुरा साय्मिया उपन्यास पिहां वल कि हे चर्चा जुइगु खः। वय्कःया उपन्यासय् अज्याःगु आकर्षण दु। थुगुसी धाःसा वय्कःया उपन्यास 'माकुगु विष' मेगु हे कथं चर्चाय् दु। कथंहंक पिहां वयाच्वंगु थ्व उपन्यासया अन्तिम एवं प्यंगूगु ब्व पिहां वयेगु तयारीइ दु। प्यंगूगु ब्व पिहां वइगु जक मखु, यदि थुगु ब्वय् उपन्यासया बाखं गय् यानाः क्वचायेकातल धकाः अनुमान यानाः पाय्छि लिसः बी फत धाःसा वयात १५,५५५/� तका दां सिरपाः नं दइ।
माघ महिनाया दुने अज्याःगु पाय्छि लिसः छ्वया हयेमाः धकाः ई बियातःगु खः। उकथं २० म्हेसिनं लिसः छ्वया हयेधुंकूगु दु। तर फुक्कं लिसः आशा सफूकुथिइ भाजु राजा शाक्ययाके बन्द अवस्थाय् लानाच्वंगु दनि। थ्व लिसः आः थथें चायेकी मखुनि। दकलय् न्हापां 'माकुगु विष'या अन्तिम ब्व छापे जुया वइ। अले थ्व बन्द खाम चायेकी। चायेकीथाय् आशा सफूकुथिया पुस्तकालयाध्यक्ष राजा शाक्य नापं बाखं दबूया नायः लक्ष्मण राजवंशी, उपन्यासकार मथुरा साय्मि व प्रकाशक कुतः पिकाकया प्रतिनिधि च्वनी ।

उपन्यासकार साय्मिया बिचाः दु, उपन्यासया अन्तिम ब्व अथें पिकायेगु जुइ मखु। उकिया लागिं छगू बिस्कं समारोह यायेगु व अन अन्तिम ब्वया विमोचन नापं पाय्छि लिसः बिउम्हेसित सिरपाः लःल्हायेगु ज्या नं जुइ ।

उपन्यास च्वये सिधयेधुंकल। अथे खःसां थ्व गय् यानाः क्वचाल जुइ धकाः ला वय्कः मकनीम्ह हे जुल। वय्कःया थुगु उपन्यास क्वचायेकाय् यक्वसिया उत्सुकता सुलाच्वंगु दु। वय्कलं थुलि जक धयादिल, 'प्यंगूगु ब्व न्हापा न्हापाया ब्व स्वयां भचा तपँ। करिब १५० पेज ति दइ। सम्भवतः वैशाख जेठपाखेर पिहां वइ ।'

खतुं वय्कलं 'माकुगु विष' छगू सफुलिं हे क्वचाल धकाः च्वयादीगु उपन्यास खः। तर परिस्थितिं उकियात न्ह्याका यंकल। निगूगु ब्व पिहां वल। स्वंगूगु ब्व पिहां वल। आः प्यंगूगु ब्व नं पिहां हे वल धाःसां जिल। तर आः वयाः प्यंगूगु ब्व पिहां वयेत्यनं नं वय्कःयात थ्व उपन्यास धाथें क्वचाः थें धाःसा च्वनाच्वंगु मदुनि। धयादी, 'जिं ला प्यंगूगुली क्वचायेके धकाः बचं हे बीधुनागुलिं जक च्वसा दिकागु खः। मनंनिसें ला थ्व उपन्यास थन नं क्वचाः थें मच्वंनि ।'

उकिं क्वचायेधुंकल धाःगु थ्व उपन्यास थनं लिपा हानं मेगु 'ब्व' जुयाः न्ह्याना वन धाःसां ब्वँमि अजू मचाःसां जिउ। अझ ला मेगु खँ, 'माकुगु विष' थय् यानाः क्वचाइगु जुइ धकाः अनुमान यासें २० म्ह ब्वँमिपिंसं उकिया 'एण्डिङ' च्वयाः छ्वया हया तयेधुंकल। जुइफु, उकी मध्ये गुगुं 'एण्डिङ' स्वयम् उपन्यासकारया 'एण्डिङ' सिबें नं बांलाना च्वनेफु। यदि अज्याःगु बांलाःगु 'एण्डिङ' लुल धाःसा मथुरा थेंज्याःम्ह सिर्जनशील व भाषाया शिल्पी उपन्यासकारयात वहे 'एण्डिङ' य् उपन्यास छुना यंकेगुपाखें पनीम्ह सु? थुकियात वय्कलं नं स्वीकार यानादी, 'आः वयाच्वंगु एण्डिङतपाखें जितः मेगु उपन्यास च्वयेत प्रेरित नं यायेफु। व चाहिं स्वयेमानिगु हे जुल ।'

वय्कलं थःगु एण्डिङलिसे ज्वःलाःगु लिसःयात थ्व सिरपाः बी धकाः घोषणा यानादीगु खः। छुं जुयाः छम्ह स्वयां अप्वःसिनं मिले याना हल धाःसा सिरपाः ला दामासाहीं हे वनीगु जुल। छम्हेसिनं हे मिले याना महल धाःसा चाहिं सही लिसः लिसे सतिक लाःगु निगू लिसःयात म्हतिं न्याद्वः व निद्वः तका सिरपाः बीगु वय्कःया ग्वसाः दु।
नेपालभाषा साहित्य ख्यलय् थज्याःगु प्रयोग जुयाच्वंगु थ्वहे न्हापांखुसी खः। थुकिं झी साहित्यह्यमितय् दथुइ छगू कथंया तरंग हया बिउगु दु ।

स्वये, मथुरां तयार यानादीगु 'माकुगु विष' या माकुगु झिंन्याद्वःत्या दांया सवाः काइम्ह सु जुइ ?

More Stories Like this