यचुरीया थुगु विश्लेषण
येँ (सन्ध्या टाइम्स)/नेपाःया राजनीतिक गतिरोध चीकेगु ताः तयाः नेपाः वयाच्वंम्ह भारतीय कम्युनिष्ट पार्टी (मार्क्सवादी) या नेता सिताराम यचुरीं भारतया द्वन्द्वरत माओवादी पुचःयात वार्ताय् हयेगु लागिं नं नेपाःया माओवादीयात सत्ताय् थ्यंकेमाःगु बिचाः प्वंकादीगु दु। थनया एमाले नेतातलिसे जूगु खँल्हाबल्हाय् वय्कलं थज्याःगु विश्लेषण न्ह्यब्वयादीगु खः ।
थौंकन्हय् भारतय् सशस्त्र युद्ध यानाच्वंपिं भारतीय माओवादीलिसे अनया सरकारं वार्ता यायेगु कुतः यानाच्वंगु दु। उगु वार्ताया उद्देश्य धइगु भारतीय माओवादीयात ल्वाभः त्वःतकाः मूलधारया राजनीतिइ हयेगु खः। यदि भारतीय माओवादी मूलधारया राजनीतिइ वल धाःसा उपिंलिसे यचुरीया हे पार्टी भाकपा (मार्क्सवादीं) तःधंगु वाम मोर्चा दयेकाः चुनावपाखें भारतया केन्द्रीय सत्ता कब्जा यायेगु बिचाः यानाच्वंगु दु ।
भारतया माओवादीयात चुनावय् विश्वास याकेगु खःसा उमित चुनाव ल्वानाः माओवादी पार्टी नं सत्ताय् थ्यनेफु धइगु उदाहरण क्यनेमाःगु दु । उकिया निंतिं नेपाःया माओवादीत चुनाव ल्वानाः सरकारय् वंगु दसु क्यने मालाच्वंगु दु। तर थौंकन्हय् नेपालय् धाःसा चुनाव त्याकाः दकलय् तःधंगु दल जुया वलं नं माओवादी सत्तां पिने लानाच्वंगु कारणं भारतीय माओवादीतय्सं चुनावयात विश्वास मयायेगु अवस्था जुयाच्वंगु दु। नेपालय् चुनाव त्यानाः नं माओवादीत सत्तां पिने लानाच्वंगु कारणं भारतीय माओवादीतय्सं यदि सत्ता कायेगु खःसा चुनाव मखु सशस्त्र विद्रोह हे याये माःगु जुयाच्वन धकाः धायेगु याना हयाच्वंगु दु। थज्याःगु विश्लेषणं यानाः भारतया माओवादीत अनया सरकारलिसे वार्ता यायेत नं अनिच्छुक जुयाच्वंगु दु ।
भाजु यचुरीं थज्याःगु विश्लेषण न्ह्यःने तसें नेपाःया माओवादीयात न्ह्याथे यानाः नं सरकारय् दुथ्याकाः राष्ट्रिय सरकारगठन यायेमाः धयादीगु खँ सूत्रं धाःगु दु। अज्याःगु राष्ट्रिय सरकार यदि वर्तमान प्रधानमन्त्री माधव नेपालया नेतृत्वय् सम्भव मदइगु खःसा मेम्ह नेताया नेतृत्वय् जूसां गठन यायेमाः धकाः नं यचुरीं धयादीगु खँ सूत्रं धाःगु दु ।
