गुलि कमजोर जुयावंगु नेपाल प्रहरी?

सर्वसाधारणयात सुरक्षा बीगु लागिं खटे जुइमाःपिं प्रहरी प्रशासन आः वयाः गुलि जक कमजोर जुइधुंकल धइगु खँ प्रहरीया हे छम्ह विशिष्ट अधिकारीयात ज्यान कायेगु धकाः बियाहःगु ख्याच्वःपाखें प्रस्ट याःगु दु। न्हापा स्वनिगःया इन्चार्ज जुइधुंकूम्ह प्रहरी अधिकृत नवराज सिलवालयात आः नकतिनि अज्ञात थासं फोन यानाः ज्यान कायेगु जुइ धकाः ख्याच्वः बियाहःगु खःसा उकिं यानाः वय्कःयात आतंकित नं याना बिउगु दु। छम्ह प्रहरी अधिकृतयात ज्यान कायेगु धकाः ख्याच्वः बियाः सुनां नं मनोरंजन जक याःगु ला अवश्य नं खइ मखु ।

छखे प्रहरी अधिकृतयात ज्यानया ख्याच्वः वयाच्वंगु इलय् लाक्क हे मेखे सञ्चार उद्यमि जमिम शाहयात स्यायेगु ज्याय् प्रहरी सेवा दुनेया हे छुं अधिकृतस्तरयापिं मनूत समेत संलग्न जुयाच्वंगु समाचार नं पिहां वःगु दु। वास्तवय् थ्व निगू घटनाया दथुइ छुं स्वापू मदुसां थुपिं थवंथवय् परिपूरक घटना धाःसा अवश्य खः। थौंकन्हय् नेपाःया प्रहरी जनताया सेवा सिबें नं गज्याःगु आपराधिक ज्याय् संलग्न जुयाच्वन धइगु खँ जमिम शाहया हत्याय् प्रहरी हे लगे जूगु घटनां क्यं। प्रहरीत थज्याःगु ज्याय् लगे जूगु कारणं थौं देय्या प्रहरी शक्ति अतिकं कमजोर जुयाच्वंगु दु। उकिया नापनापं प्रहरी शक्ति दुने जुइगु राजनीतिक हस्तक्षेप, राजनीतिक शक्तिया बः कयाः प्रहरी दुने जुइगु भ्रष्टाचारं प्रहरीयात थःगु कर्तव्य सिबें नं अन्य ज्याय् अप्वः केन्द्रित याना बिउगु दु। थुकिं यानाः नं थौं प्रहरीयात छम्ह अपराधीं फोन यानाः ज्यान कायेगु धकाः ख्याच्वः बी फइगु तह तकया कमजेर स्थितिइ थ्यंका बिउगु खः। थ्व धइगु नेपालय् प्रहरी मदु बराबरया अवस्था खः ।

More Stories Like this