धादिङय् हवाई फायर
सुथंनिसें तनाव
येँ (सन्ध्या टाइम्स)/थःपिनि कार्यकर्तायात आक्रमण याःगु विरोधय् एनेकपा (माओवादी)या वाईसीएल कार्यकर्तातय्सं थौं सुथंनिसें धादिङया सदरमुकाम धादिङवेशीइ प्रदर्शन याःगु दुसा उकी प्रहरीं हस्तक्षेप यानाः छुं कार्यकर्तायात घाःपाः याना बिउगु दु। निगू पक्ष दथुइ जूगु उगु ल्वापुइ प्रहरीं छुं राउण्ड हवाई फायर समेत याःगु दु ।
नेपाली कांग्रेसया कार्यकर्तातय्सं थःपि कार्यकर्ता गोविन्द श्रेष्ठयात आक्रमण यानाः घाःपाः याःगु धइगु द्वपं बिसें वाइसीएल कार्यकर्तातय्सं थौं सुथय् धादिङवेसीइ प्रदर्शन यायेवं उकी प्रहरीं हस्तक्षेप याःगु खः। नेपाली कांग्रेसया धादिङ जिल्ला दुजः नारायणकुमार श्रेष्ठ व स्थानीय कार्यकर्ता राधाकृष्ण भण्डारीया नेतृत्वय् वःगु पुचलं वाईसीएलया गोविन्द श्रेष्ठयात आक्रमण यानाः घाःपाः याना बिउगु खँ वाईसीएलं धाःगु दु। आक्रमणय् लानाः घाःपाः जूम्ह श्रेष्ठयात धादिङया हे सहिद मेमोरियल अस्पतालय् वासः याकातःगु दु। अन जूगु थ्व ल्वापुं यानाः सुथंनिसें उगु लागा पूर्ण रुपं तनावग्रस्त जुयाच्वंगु दु। वाईसीएल कर्याकर्तातय्सं प्रहरी हस्तक्षेप लिपा नं मदिक्क हे प्रदर्शन यानाच्वंगु दु ।
पेस्तोल सहित वःपिंत प्रहरीं मज्वंगु वाईसीएलया द्वपं
येँ (सन्ध्या टाइम्स)/एनेकपा (माओवादी) कार्यकर्ता गोविन्द श्रेष्ठयात आक्रमण यानाः घाःपाः याना बिउपिं नेपाली कांग्रेसया कार्यकर्तात पेस्तोल हे ज्वनाः धादिङय् च्वनाच्वंगु इलय् उमित ज्वनेफुसां नं स्थानीय प्रशासन व प्रहरीं मज्वंगु द्वपं वाईसीएलं बिउगु दु। उमित मज्वंगु खँय् विरोध यासें वाईसीएल कार्यकर्तातय्सं प्रहरी ज्याकू न्ह्यःने नाराबाजी यानाच्वंगु दु ।
धादिङवेसीया पुल हाउस एण्ड रेष्टुरेन्टय् पेस्तोल ज्वनावःपिं मनूत च्वनाच्वंगु जूसां इमित प्रहरीं मज्वंगु खँ वाईसीएल कार्यकर्तातय्सं धाःगु दु ।
माओवादी कार्यकर्तातय्सं अपराधीयात ज्वनाः तत्काल कारवाही यायेमाःगु, शान्ति सुरक्षाया व्यवस्था यायेमाःगु माग यासें प्रदर्शन यानाच्वंगुलिं अनया स्थिति तनावग्रस्त जुयाच्वंगु खः ।
सुथंनिसें हे तनावग्रस्त जुयाच्वंगु खँ सियाः धादिङवेसीया जःखः लागाय् च्वंपिं माओवादी कार्यकर्तात नं अन हे मुनाः प्रदर्शनय् ब्वति कयाच्वंगु दु। उमिसं तच्वकं नारा नं थ्वयेकाच्वंगु दु ।
