गृहमन्त्री छु यानाच्वन थौंकन्हय्?

देय्या सुरक्षा स्थिति न्हियान्हिथं हे स्यना वनाच्वंगु झ्वलय् आः सञ्चार ख्यःलिसे सम्बद्ध मनूत नं आक्रमणया निशाना जुया वःगु दु। येँय् सञ्चार उद्यमि जमिम शाहया हत्या लिपा जनकपुरय् मेम्ह सञ्चार उद्यमि अरुण सिंहानियाया हत्या जूगु दु। सञ्चार उद्यमितय् हत्यायात कयाः थनया पेशागत समूह आक्रोशित जुयाच्वंगु इलय् लाक्क येँय् जमिम शाहयात स्याःगु शैलीं हे हानं मेम्ह छम्ह व्यक्तित्वयात स्यायेगु कुतः जूगु दु। खुल्ला सतकय् पेस्तोलं कयेकाः अपराधी बिसिउँ वनेत सफल जूसां प्रहरीं धाःसा सुयातं ज्वने मफु। जमिम शाहया हत्या प्रकरणय् प्रहरीं छुं हे मयाः धकाः खुब आलोचना जूगुलिं नागेन्द्र किसन पाम्पटीयात याःगु आक्रमण लिपा प्रहरीं तुरुन्त हे नाका नाकाय् छानबिन यानाः 'छुं' यायेगु कुतः याःगु दु। तर प्रहरीं कुतः यातं नं अपराधी धाःसा प्रहरीया घेराय् लाये मफुनि ।

थज्याःगु खुलेआम हत्याया घटनां देय्या सुरक्षास्थिति गुलि स्यनाच्वन धइगु खँ स्पष्ट याःगु दु। उकिं थ्व अवस्थाय् सुरक्षायात गय् यानाः बल्लाकेगु खः उकिया बारे गम्भीर रुपं बिचाः यायेमाःगु अतिकं आवश्यक दु। यदि वर्तमान गृहमन्त्रीं अज्याःगु बिचाः याये मफुसा वय्कःयात चीकाः मेम्ह हयाः जूसां थुखेपाखे पलाः न्ह्याकेमाःगु स्थिति दु। थ्व छगू राष्ट्रिय समस्या खः। आः नं गुलिखे पत्रकार, व्यवसायीयात ज्यान कायेगु ख्याच्वः वयाच्वंगु दु। थ्व समस्या ज्यंकेत सरकारं विपक्षीया समेत साथ कयाः पलाः न्ह्याकेमाःगु आवश्यक जुइ। फुक्क शक्ति छप्पँ जूसा अपराधयात पने मफइगु मखु, तर उकिया लागिं नुगः व कुतः नितां माः ।

More Stories Like this