अबलय्या आन्दोलन लुमंकेबलय्...

कृष्ण

जनआन्दोलनया घाइते

देशय् २०४६ सालया जनआन्दोलन जूगु पाय्छि नीदँ पूवन। अबलय् जनआन्दोलनया इलय् घाःपाः जूपिं, अपांग जूपिं योद्धात धाःसा थौं तक नं थीथी कथं थःपिनि कठीन जीवन यापन यायेत बाध्य जुयाच्वंगु दु। थज्याःगु हे दुःखद् जीवन हनाच्वंम्ह छम्ह ल्याय्म्ह खः, सत्यसम्मेलन राजोपाध्याय। मध्यमवर्गीय परिवारय् जन्म जूम्ह सत्यसम्मेलन राजोपाध्याय धर्मेन्द्र राजोपाध्याय व मोहनदेवी राजोपाध्यायया काय खः। वय्कः तप्यंक गुगुं राजनीतिक पार्टीया कार्यकर्ता मखुसां ख्वपय् नेमकिपाया कार्यकर्तात वय्कःया छेँय् भूमिगत च्वनीगु जुयाच्वन। उकथं समर्थन तक दुगु व राजनेतातय्त हे संरक्षण याइगु छेँ जूगुलिं २०४६ सालया जनआन्दोलनया झ्वलय् उगु छेँय् नेतात सुलाच्वंगु दु ला धकाः सत्यसम्मेलन राजोपाध्ययया छेँय् प्रहरीं खानतलासी काः वल ।

ख्वपया ११ वडा टौमढीइ लाःगु वय्कःया छेँय् २०४५ सालया भक्तपुर काण्ड जूगु इलय् व २०३६ सालया आन्दोलनय् नं अथे हे राजनेतात सुलाच्वंगु दु ला धकाः स्वःवःगु खः। तर २०४६ सालया थ्व घटनाय् धाःसा अन सुलाच्वंपिं मेपिं सुयातं ज्वने मफुत। उकिं मां मोहनदेवी व काय सत्यसम्मेलनयात प्रहरीं थःगु हे छेँय् छ्यलिइ तयाः दाये फक्व दाल। खास यानाः २०४६ सालया जनआन्दोलन दबे यायेगु निंतिं नीस्वंगु प्रतिकार समूहया दुजःतय्सं हे सत्यसम्मेलनया छेँ क्यना बिउगु खः। थ्व झ्वलय् चैत १७ गते बहनी दाजु कमलं लुखा चायेकेत नक नक याःगु थें च्वंक नक नक याःवल। वास्तवय् उगु इलय् वःपिं फुक्कं सशस्त्र प्रहरी जुयाच्वन। फुक्कसिकें हतियार नं दुगु ।

प्रहरीं ज्यापुतय्त ग्वाहालि व संरक्षण याइपिं छिपिं हे मखु ला धाधां कथि व बुटं दादां थ्वात। मामं त्वाःबाहायापिंके ग्वाहालि नं फ्वंगु खः। तर अन अज्याःगु आपतय् सुं हे मवल। वयां लिपा पित हयाः क्याफे न्ह्यःने च्वःपिं बन्दूकधारी प्रहरीतय्सं बुटं थ्वाथ्वां बन्दूकया नालं प्वाथय् सुतुमतु सुल। सत्यसम्मेलनया प्वाः ह्वगन। प्वाः ह्वगनाः भ्वरि पिहां वयाः व बेहोस जुल। होशय् वःथे वःथे च्वनेवं 'ज्यापु होशमा आएको' धाधां हानं प्वाथय् हे बुटं प्यंकाच्वंगु खन। लिपा होश वःगु इलय् सलाइन थनाः अस्पतालय् थःत ग्वारातुइका तःगु खन। प्वाः छगलं घाःया घाः जक दु।
थुकथं छगू ल्याखं पंचायती प्रहरीं दायाः सीम्ह ला म्वाःम्ह ला यानातःम्ह सत्यसम्मेलन राजोपाध्याययात लिपा सुं नं राजनीतिक पार्टी व आन्दोलनया न्ह्यलुवातय्सं ध्यान तकं मतः। अथे खःसां ख्वपय् जुइगु घाइते योद्धात मुनेज्याय् वय्कः नं मफु मफु झायादी। 'आन्दोलनया अपराधीतय्त आः जूसां कारवाही याये हे माः' वय्कलं आक्रोशित जुयाः धयादी ।

दकलय् अप्वः यातना फःम्ह शहदेव
२०४६ सालया जनआन्दोलनया झ्वलय् गोलीं लानाः घाःपाः जुयां नं दकलय् अप्वः प्रहरीया यातना भोगे याःम्ह ब्यक्तित्व शायद शहदेव ख्याजू हे जुइ। गोलीं कयाः तज्याःगु तुतिइ न्हुत्तु न्हुयाः यातना बियां नं मगानाः अझ कथि हे चुंचुं जुइक दाःगु जुयाच्वन ।

थःत गोली लायेवं न्हापां वासः यायेत परोपकारय् यंकूगु खःसां लिपा डेरसिङ्ग यानाः वय्कःयात परोपकारं भ्वँतय् अस्पतालय् यंकूगु जुयाच्वन। मिनिट्रकय् तयाः वय्कः नापं स्वम्हेसित अबलय् अन यंकूगु खः ।

'अनं नं मजीवं लिपा अनया अस्पतालय् च्वंगु एम्बुलेन्सं पाटन अस्पतालय् यंकल। अन नं कन्हय् जक अप्रेशन जुइ धकाः चछि अथें हे स्याका तल। पाटन अस्पतालय् हे वयाः पुलिसं ज्वं वल। पुलिसं ज्वं वःसां डाक्टरं यंके मजिउ धकाः मछ्वः। लिपा प्रहरी हे छम्ह पाः तयेगु यात। थः होश दुगु मखु। पाटन अस्पतालय् च्वंच्वं हे डिएसपी नाप स्वापू जुल। अस्पतालं डिएसपी कार्यालयय् यंकल। लिपा छेँय् यंकेगु धाधां जुलुसय् वःपिं सु सु नां धा धाधां बुटं थ्वात। अबलय् तक जि गन दु धइगु हे जिमि बांअबुपिंसं मसिउनि।' थःगु नीदँ पुलांगु यातना लुमंकाः शहदेवं कनादी ।

लिपा छेँय् यंकेगु धकाः ख्वपया डिएसपी कार्यालयय् हल। अन नं प्रहरीं थप बुटं थ्वात। वय्कःयात थ्वाःगु खनाः जःखः च्वंपिं बन्दीत तकं ग्वारा चिनेमालीगु अवस्था वल। थथे घाःपाः जूम्हेसित थप थ्वाइबलय् बेहोस् बेहोस जुइगु। स्याःगुया ला खँ ल्हानां हे मब्याः। यातना बियातःगु इलय् जा बजि नं मनकू। निन्हु स्वन्हु तक गोलीं लाःम्ह मनू अथें द्यांलाना च्वनेमाल। पुलिसं लिपा तकं प्यंपाय् व लिउने दुगःक्वँचय् दाइगुलिं फ्यतुइ नं मजिउ द्यने नं मजिउ ।

More Stories Like this