थौंया जगत सुन्दर ब्वनेकुथि

सुनीता मानन्धर

ने.सं. ११११ सं दकलय् न्हापां ब्वनेकुथि चायेकूगु इलय् मुक्कं स्वम्ह जक शिक्षिकापिंसं स्वयंसेवक जुयाः ज्या यानादीगु खः। दछि लिपा ब्वँमितय् ल्याः अप्वयेवं शिक्षिकापिनिगु माग नं जुल। वहे कथं नेपालभाषाया लागिं शान्ति मानन्धर व अंग्रेजीया निंतिं खगेन्द्र राईयात नियुक्त यात। थौं ब्वनेकुथिइ थ्यंमथ्यं नीन्याम्ह स्यनामि दु ।

ब्वनेकुथिइ न्हापांगु दँय् पीप्यम्ह जक ब्वँमि दुगु खःसा थौं स्वसःत्या ब्वनाच्वंगु दु। अथेहे ब्वनेकुथिइ ब्वने क्वचायेकाः थःगु आज्जुइ थ्यंपिं ब्वँमिपिं नं तःम्ह हे दयेधुंकल। थुगु ब्वनेकुथिया ब्वँमि मञ्जु चित्रकार दकलय् न्हापां नर्स जूगु खःसा थौंकन्हय् वयकः लण्डन झायादीगु दु। अथे हे विद्या खड्गी, सृजना मुनिकार, सुनीता महर्जन, कृष्टिना कसाः नं नर्स जुयादीधुंकल। अथेहे महेश महर्जन, सिद्धार्थ शाही छुं दँ लिपा हे इन्जिनियर ब्वने क्वचायेका दीत्यंगु दु। ब्वँमि जीना चौधरी छम्ह सफल डान्स टिचर जुयाः ज्या यानाच्वनादीगु दु
।

अथेला नेपालभाषाया माध्यमं आखः ब्वंकीगु खःसां थन थीथी अतिरिक्त क्रियाकलाप नं याना वयाच्वंगु दु। उकी थीथी कासा, किपा च्वज्या, संगीत, हुलाप्याखं, कम्प्यूटर, न्ह्यसः लिसः कासा दुथ्याः ।

संगीत - ब्वनेकुथि नीस्वनाः छुं दँ लिपा हे भाजु रामकृष्ण दुवालं ब्वँमिपिंत संगीत स्यनेगु यानादीगु खः। वय्कलं स्यनादीगु म्येँ थौं तक नं ब्वनेकुथी राष्ट्रिय म्येँ कथं हायेका वयाच्वंगु दु। थौंकन्हय् ब्वनेकुथिइ गिटार, सितार, किबोर्ड, बाँसुरी, ड्रमसेट, मगःखिं आदि वाद्यवादनया व्यवस्था दु ।

कासा - ब्वनेकुथिइ शुक्रवाःपतिकं ब्वँमिपिंत थीथी कासा म्हितकी। गथेकि म्यूजिकल चेयर, टेबुल टेनिस, तेलकासा, कबर्डी, दाङदुङ कासा, खिपः, लुडो, ब्याटमिन्टन, क्यारेम बोर्ड, फुटबल, भलिबल आदि ।

किपा च्वज्या - ब्वनेकुथिया स्यनामि चन्दा श्रेष्ठं ब्वँमिपिंत किपा च्वयेगु स्यनादी। थुगु ज्या ब्वनेकुथि दुने जक सीमित मयासे थीथी थासय् यंकाः लाइन स्केच याकेगु ज्या नं जुयाच्वंगु दु ।

हुलाप्याखं - ने.सं. १११५ निसें थौंतक मदिक्क ब्वँमिपिंत हुलाप्याखं नं स्यनाच्वंगु दु। थन नेवाः नापं खस, तामाङ, भोजपुरी आदि हुलाप्याखं नं स्यनी।

कम्प्यूटर - थौंया ई कम्प्यूटरया ई खः। ने.सं. ११२० निसें ब्वनेकुथी कम्प्यूटर कक्षा नं दुथ्याकूगु खः। थौं ब्वनेकुथी थ्यंमथ्यं नीगः कम्प्यूटर दु ।

न्ह्यसःलिसः कासा - ब्वँमिपिनिगु बौद्धिक ज्ञानया विकास यायेगु तातुनाः ब्वनेकुथी इलय् ब्यलय् न्ह्यसः लिसः कासा नं जुयाच्वंगु दु। थुगु कासा नेपालभाषा नापं अंग्रेजी भासं नं याना वयाच्वंगु दु। अथेहे इलय् ब्यलय् चिनाखँ, च्वखँ धेंधें बल्लाः नं जुयाच्वंगु दु ।

ब्वनेकुथिया अतिरिक्त व्यवस्था कथं डाक्टरया व्यवस्था, टिफिन नकेगु, गुँभ्वय्या व्यवस्था, प्रकृति क्लबया व्यवस्था, सफू धुकूया व्यवस्था, दबू छेँया व्यवस्था नं दु। थौं स्वयां स्वदँ न्ह्यः न्हूगु लकसय् मस्तय्त न्ह्यइपुक व यइपुक आखः ब्वंकेगु निंतिं किण्डरगार्टेन ब्लकया व्यवस्था नं जूगु दु।
थगुने न्हापांखुसी ब्वनेकुथिया झिंस्वम्ह ब्वँमिपिंसं एस.एल.सी. इ ब्वतिकाःगु खः। गुकी खुम्ह विशिष्ट श्रेणी हयेत ताःलात। ब्वँमिपिंत हःपाः बीकथं कुमारी प्रकाशनपाखें दँय्दसं तगिं छगू निसें झिगू तकया ब्वँमिपिं मध्ये न्हाप लाःपिंत दसिपौ व पदक लःल्हायेगु ज्या नं जुयाच्वंगु दु।
थुगु ब्वनेकुथिं यानाच्वंगु भाषा सेवाया ज्यायात कदर यासें 'चित्तधर सिरपाः' ने.सं. १११२ स लःल्हाःगु खः। अथे हे मांभासं शिक्षायात प्रवर्द्धन याःगुलिं सिविन पाखें सन् २००६ स हनापौ लःल्हात। अथेहे मचा लय्पौ ईलोहं प्रकाशनपाखें नं ब्वनेकुथिं याःगु योगदानयात कदर यासें हनापौ लःल्हाःगु दु। ने.सं. ११२९ स प्याब्सनपाखें एस.एल.सी. इ १०० प्रतिशत विशिष्ट श्रेणी नापं न्हापांगु श्रेणी हयेत ताःलाःगुलिं भिन्तुना पौ लःल्हात। थुगु लिच्वःयात कदर यासें कुमारी प्रकाशनपाखें नं भिन्तुना पौ लःल्हाःगु खः ।

थौं ब्वनेकुथिं मां भासं आखः ब्वंकाः नं थःगु थाय् कायेफु धइगु खँयात प्रमाणित याना बिउगु दु। थ्व नेवाःतय्गु जक मखु, सकलें जनजातिया नितिं हे गर्वया खँ खः ।

More Stories Like this