पत्रकारपाखें देय्न्यंकं प्रदर्शन

येँ (सन्ध्या टाइम्स)/संचार उद्यमी नापं व्यवसायी अरुण सिंहानियायात गोलीं कयेकाः स्याःगु नापं संचारकर्मीतय्त लगातार जुयाच्वंगु आक्रमणया विरोधय् नेपाल पत्रकार महासंघं थौं देय्न्यंकं प्रदर्शन यासें सीडीओ ज्याकुथी धर्ना बिउगु दु ।

पत्रकार महासंघया म्हिगः च्वंगु केन्द्रीय बैठकं थौं जिल्ला जिल्लाय् विरोध प्रदर्शन यानाः सीडीओ ज्याकुथी धर्ना बीगु अले स्वनिगःया हकय् येँया सीडीओ ज्याकुथी न्हिनय् १ घण्टा धर्ना बीगु ज्याझ्वः दयेकूगु दु। महासंघपाखें निर्धारित ज्याझ्वः कथं थौं देय्या फुक्कं जिल्लाय् थ्व ज्याझ्वः न्ह्यानाच्वंगु दु ।

सञ्चारकर्मीतय्त माक्व सुविधा बी मफुगु धासें पत्रकारतय्सं गृहमन्त्री भिम रावलया राजीनामा समेत माग याःगु दु।
थ्वहे झ्वलय् पेशागत पुचःतय् संस्था पापडपाखें थौं प्रधानमन्त्री माधव नेपालयात नापलानाः देय्या शान्ति सुरक्षा स्यना वनाच्वंगु बारे ज्ञापनपत्र बीगु जूगु दु। पेशाकर्मीतय्त वयाच्वंगु ज्यानया खतरा विरुद्ध पापडपाखें आइतवाः येँय् छगू वृहत् र्‍याली नं पिकायेत्यंगु दु।
उखे म्हिगः शान्ति सुरक्षाया माग यासें गृहमन्त्री नापलाःवंपिं पत्रकारतय्त गृहमन्त्रीं दुर्व्यवहार याना हःगु खँयात कयाः पत्रकार पुचः रुष्ट जुयाच्वंगु दु ।

धनुषाया फुक्क हे उद्योग बन्द
येँ (सन्ध्या टाइम्स)/संचार उद्यमी नापं व्यवसायी अरुण सिंहानियायात स्याना बिउगु घटनाया विरोधय् थौं नेपाल उद्योग वाणिज्य महासंघ धनुषा जिल्लाया आह्वानय् अनया फुक्क कलकारखाना बन्द जूगु दु। शान्ति सुरक्षाया माग नापं उद्यमी सिंहानियायात स्याःपिं अपराधीतय्त ज्वनाः कारवाही यायेमाःगु माग यासें थौं धनुषाया उद्योग बन्दया आह्वान याःगु खः। धनुषा जिल्लाया सदरमुकामय् हे संचार उद्यमी सिंहानियायात स्याना बिउगु विराधय् म्हिगः नं नेपालगञ्जया उद्यमी व व्यापारीतय्सं उद्योग नापं बजाः बन्द याःगु खः ।

उखे म्हिगः आतंकं यानाः बन्द जूगु धनुषाया बजाः व यातायात थौं चालेगु शुरु जूगु दु। थौं सुथंनिसें अनया जनजीवन सामान्य जुजुं वयाच्वंगु खँ धाःगु दु ।

थ्व हे झ्वलय् नेपाल उद्योग महासंघ व चेम्बर अफ कमर्शं यदि चैत्र २८ गते तकया दुने नं शान्ति सुरक्षाया बांलाःगु व्यवस्था मजुल धाःसा देय्या फुक्क उद्योगय् तालं ग्वयाः ताःचा सरकारयात हे लःल्हायेगु जुइ धकाः घोषणा यायेधुंकूगु दु ।