हानं छक्वः भारतीय नेताया आगमन

न्ह्याक्व हे सहमतिया खँ ल्हाःसां सहमत जुइ मफयाच्वंगु देय्या राजनीतिक गतिरोध चीकेगु लागिं हानं छम्ह भारतीय नेता नेपाः भ्रमणय् वःगु दु। भारतीय कम्युनिष्ट पार्टी (मार्क्सवादी) या नेता सिताराम यचुरी थुगुसी नेपाःया राजनीतिक गतिरोध चीकेगु भारतीय सरकारया एजेण्डा ज्वनाः नेपाः भ्रमणय् वःगु खः। आः वय्कः नेपाःया थीथी नेतातय्त नापलानाः थःपिनि एजेण्डाय् खँ ब्याकेत व्यस्त जुयाच्वंगु दु। शायद नेपाःया नेतात थःथः च्वनाः समाधान याये मफुगु थ्व समस्या आः भारतीय नेताया प्रत्यक्ष उपस्थिति व निर्देशन लिपा याउँक ज्यना वनी जुइ। राजनीतिक गतिरोध भारतया थीथी प्रान्तय् नं गबलें गबलें जू। तर अन जुइगु राजनीतिक गतिरोध चीकेत गबलें नं अनया केन्द्रं हस्तक्षेप यायेम्वाः। न याःगु हस्तक्षेपयात स्वीकार हे याइ। तर नेपाःया खँ बिस्कं दु। थन भारतया हस्तक्षेप थुलि आवश्यक जुयाच्वनी कि उलि ला अनया केन्द्रीय नेतातय्सं थःगु हे देशया गुगुं प्रान्तय् तक नं यायेमाःगु खइ मखु। माओवादीतय्सं स्वाधीनताया आन्दोलन न्ह्याकाच्वंगु इलय् हे भारतीय नेतां याःगु थ्व भ्रमणयात स्वयम् माओवादीं नं साथ बियाच्वंगु दु। थ्व खास यानाः माओवादीया हे लागिं जुयाच्वंगु भ्रमण खः। मेपिं छ्वया हल धाःसा माओवादी तयार मजुइ धकाः छम्ह वामपन्थी नेतायात हे भारतं छ्वया हःगु खः। थज्याःगु ज्याय् केवल भारत यात जक दोष बीगु नं पाय्छि मजुइ। छाय्धाःसां नेपाःया नेतात थःपिं हे जानाः थःगु समस्या ज्यंकेगु ज्या मयात धाःसा अन पिनेयापिं वयाः म्हितेगु थाय् प्रशस्त दइ। नेपाःया नेतातय्सं अज्याःगु थाय् बियाच्वंगु दु ।

More Stories Like this