यचुरीया न्हूगु समीकरण
रामचन्द्रया नेतृत्वय् माओवादी सहितया सरकार
येँ (सन्ध्या टाइम्स)/भारतीय कम्युनिष्ट पार्टीया पोलिटब्युरो दुजः सिताराम यचुरी नेपाःया राजनीतिक गतिरोध ज्यंकेगु लागिं विशेष प्याकेज ज्वनाः नेपाः वःगु खँ सीदुगु दु। वय्कः थुगुसी थःगु निजी बिचाः ज्वनाः सिबें नं भारतीय सरकारया हे बिचाः ज्वनाः नेपाः वःगु खँ नं विज्ञ सूत्रं धाःगु दु ।
विज्ञ सूत्रया कथं वय्कःया थ्व भ्रमण फुसा प्रधानमन्त्री माधव नेपालया हे नेतृत्वय् माओवादी सहितया राष्ट्रिय सरकार दयेकेगु ज्याय् केन्द्रित जुइ। प्रम नेपालयात भारत सरकारं गाक्कं समर्थन बियाच्वंगुलिं वय्कःया सरकार क्वःथलेत भारत अझ नं तयार मदुनि। छुं जुयाः थ्व कुतः सफल मजुल धाःसा नेपाली कांग्रेस संसदीय दलया नेता रामचन्द्र पौडेलया नेतृत्वय् सरकार दयेकाः उकी माओवादी नं दुथ्याकेगु रणनीतिपाखे वय्कलं कुतः यानादी धाःगु दु। पौडेलयात प्रधानमन्त्री दयेकेगु खँय् नेकां सभापति गिरिजा प्रसाद कोइराला तयार मजूगुलिं उकुन्हु तक थ्व कुतः नं ताःमलानाच्वंगु खः। कोइरालाया अप्रत्यक्ष रुपं थः हे म्ह्याय् सुजाता कोइरालापाखे केन्द्रित जुयाच्वंगु खः। तर आः भारतपाखें नं 'दवाव' वःगु कारणं कोइराला नं रामचन्द्र पौडेलया नामय् सहमत जुइधुंकूगु खँ धाःगु दु ।
पौडेलयात प्रम दयेकेगु खँय् एमाले नं सहमत जुइफइगु सम्भावना दु। तर कोइराला व एमाले सहमत जूसां माओवादीं छु धाइ धइगु खँ धाःसा अझं प्रस्ट मजूनि। उकिं आः माओवादीयात थुकी सहमत यायेगु कुतः यचुरीं यानादीगु खँ धाःगु दु। माओवादी जनयुद्ध त्वःताः मूलधारय् वसांनिसें उपिंलिसे 'डिल' यायेगु ज्या भारतं यचुरीयात हे बियातःगु खः। उकिं आः नं यदि यचुरीं थ्व प्रस्ताव यंकल धाःसा माओवादी तयार जुइ धइगु बिचाः भारतं तयाच्वंगु खँ धाःगु दु। भाजु यचुरीं थौं माओवादी अध्यक्ष प्रचण्डयात नापलानादीत्यंगु दु ।
