बन्द मयायेगु बचं लिपाया बन्द

देशय् पर्यटन वर्ष शुरु यायेगु लागिं सन् २०११ जःछि हे गुगुं नं राजनीतिक पार्टीं बन्द हडताल थेंज्याःगु ज्याझ्वः यायेगु मखु धकाः घोषणा याःगु निन्हु हे मदुनिबलय् माओवादी समर्थित वाईसीएल कार्यकर्तातय्सं सुर्खेत उपत्यका अनिश्चित काल तक बन्द यायेगु धकाः घोषणा याःगु दु। वाईसीएल व युथ फोर्स दथुइ जूगु ल्वापुइ लानाः थः कार्यकर्ता सित धकाः याःगु थ्व बन्दं यानाः उगु लागाया जनजीवन आः ग्वःन्हु तक अस्तव्यस्त जुइगु खः ठेगान मदु। यदि उगु ल्वापुइ युथ फोर्सया कार्यकर्ता सीगु खःसा उमिसं नं विरोध स्वरुप याइगु ला थज्याःगु हे बन्द जुइमाः। राजनीतिक पार्टीतय्सं बन्द हडताल याये मखु धकाः सकस्यां न्ह्यःने प्रतिवद्धता प्वंकूसां उमि भ्रातृ संगठनतय्सं मातृ पार्टीया निर्देशनयात समेत टेरे मयासे घोषणा याइगु थज्याःगु बन्द ज्याझ्वःयात सुनां पनीगु खः व धाःसा आः थथें धाये फुगु अवस्था मदु ।

मेगु खँ, दछि तक बन्द हडताल याये मखु धाःगु दु तर थ्वहे दछिया दुने देय्या न्हूगु संविधान जारी यायेगु तयारी नं जुयाच्वंगु दु। न्हूगु संविधान जारी जुल हे धाःसां वपाखें असन्तुष्ट थीथी खेमां विरोधय् शायद बन्द हे याइ जुइ। छुं जुयाः संविधान जारी मजुल धाःसां नं जारी यायेमाः धाइपिं पुचःतय्सं बन्द हडताल ला या हे याइ जुइ। शायद उगु इलय् राजनीतिक पार्टीतय्सं तक नं पर्यटन वर्ष सफलताया लागिं बन्द याये मखु धकाः बिउगु बचं ल्वःमंकी जुइ। थःपिंसं बियागु बचंयात ल्वःमंकेगु व उकियात सुनां लुमंका हे बिउसां नं स्थिति हिलेधुंकल धासें थःगु हे जिद्दी लादे यायेगु नेपाःया राजनीतिक पार्टीतय् पहः ला झीसं स्वया हे वयाच्वनागु खः, हानं स्वये दइगु जुल ।

More Stories Like this