तिंख्यलय् गुरुमापायात नकीगु जा

थुगुसी ला जा तः वनेगु जात्रा स्वः वयाच्वंम्ह निम्ह प्यम्ह मनूतय्सं गुरुमापायात धकाः तयातःगु ब्वय् हे च्वनाः पाकापाकां गुरुमापाया जा नःगु नं खने खत ।

दँय्दसं होलि पुन्हिबलय् शुद्ध चान्हय् तिंख्यलय् वनाः गुरुमापायात जा तः वनेगु चलन आः तकं दनि। म्हीग होलि पुन्हिया चान्हय् नं उगु ज्या जुल। तर न्हापा जूसा भूतयात तःगु जा धकाः सुनां मथीगु उगु जा थौंकन्हय् धाःसा मनूतय्सं लाकालुकु यानाः यंकीगु चलन जुया वःगु दु। अझ थुगुसी ला जा तः वनेगु जात्रा स्वः वयाच्वंम्ह निम्ह प्यम्ह मनूतय्सं गुरुमापायात धकाः तयातःगु ब्वय् हे च्वनाः पाकापाकां गुरुमापाया जा नःगु नं खने दत ।

गुरुमापाया लागिं धकाः तइगु थ्व जा येँया इतुम्बाहालं यंकीगु खः। थुकी फछि जाकिया जा व म्येय्या छ्यं छगः नं दइ। जा व म्येय्या छ्यं तयाः कुबिया यंकीगु थ्व खःमू तिंख्यलय् मथ्यंतले गनं नं दिके मजिउ धाइ। अथे खःसां कुबिया यंकु यंकुं तिंख्यः ध्वाखाया न्ह्यःने च्वंगु गणेद्यःयाथाय् छक्वः थ्व कु दिकी। कारण छु धायेबलय् गुरुमापायात धकाः जा थुयाच्वंगु भचा लिबाःबलय् तिंख्यलय् च्वंम्ह गुरुमापां 'आः थुमिसं जितः जा नके हइ मखुत, जि हे नगरय् दुहां वनाः नः वने माल' धकाः वयाच्वंबलय् जा कुबिया हयाच्वंपिंसं वयात अन नापलाकूगु जुयाच्वन हं। अले वयात अन हे भाग तयाः नकेगु शुरु यात। वयां लिपा अनं निसें हे जा ह्वह्वं गुरुमापायात तिंख्यः दुने तक ब्वना यंकल। अले अन हे तयाः वयात त्यंक नकल। गुरुमापायात जा नकेगु सम्बन्धी किंवदन्ती थज्याःगु दु।
उकिं थौंकन्हय् गुरुमापायात जा नके यंकीबलय् तिंख्यः ध्वाखा न्ह्यःने छक्वः कु दिकाः छगू भाग तइ। अनं लिपा हा ! हा ! हाहां जा ह्वलाः तिंख्यः दुने यंकी। अन तःधंगु छगू भाग तयाः उकिया द्यःने मत छप्वाः च्याका थकी। अले नापं वंपिं सकलें अन हे फ्यतुनाः प्रसाद ग्रहण यानाः लिहां वइ। उगु प्रसादयात गुलिसिनं नयेधुंकाः प्वः चिनाः छेँय् नं हइ। अज्याःगु प्रसादं छेँय् सुनां स्यंका तःगु दुसा उकियात मदयेका बी धइगु पुलांपिनि विश्वास दु ।

गुरुमापाया बाखं
गुरुमापा विशुद्ध नेवाः न्यँकँ बाखंलिसे स्वापू दुम्ह छम्ह पात्र खः। येँया इतुम्बाहालय् च्वंम्ह केशचन्द्र धाःम्ह छम्ह मनुखं गुरुमापायात येँय् ब्वना हःगु व उम्ह गुरुमापां थनया मस्त नयेगु शुरु यासेंलि वयात थन तये हे मजिल धकाः तिंख्यः दथुइ तये यंकल धइगु छपु बाखं दुने खने दइम्ह पात्र खः गुरुमापा। गुरुमापा तिंख्यः दथुया याकः सिमा क्वय् दनि धइगु धापूयात पत्याः यानाः छुं दँ न्ह्यः तक नं मनूत तिंख्यः दथुइ च्वंगु याकः सिमाया न्ह्यःने वनी मखु। आः ला उगु याकः सिमा हे पाला छ्वयेधुंकल। उकिं आः गुरुमापा वइ धइगु ला खँ हे मंत। अथे खःसां उगु याकःसिमा दुगु थासय् दँय् छभाग जा तये यंकेगु चलन धाःसा अझं दनि ।

More Stories Like this