वर्ग संघर्ष च्वन्ह्याकेमाः

कृष्ण प्रजापति

न्हूगु संविधान तयार यायेगु निंतिं युद्धस्तरं ज्या जुयाच्वंगु थ्व इलय् संविधान गज्याःगु जुइमाः धइगु खँय् धाःसा थीथी राजनीतिक दलया दथुइ मत भिन्नतात खने दयावःगु दु। झिंनिदँ तक जंगलय् च्वनाः जनयुद्ध यानावःगु कम्युनिष्ट पार्टी माओवादीं तकं युद्ध व वर्ग संघर्षयात त्वःताः पुँजीवादी लाइन ज्वंगुलिं यानाः वर्ग संघर्षया खँ ध्याकुनय् लाःवंगु दु। तर आखिर सर्वहारा वर्गया शासन स्थापना यायेगु कम्युनिष्ट पार्टीया लक्ष्य पूवंकेगु निंतिं धाःसा वर्ग संघर्षया लिधंसा मकासे हे मगाः। वर्ग समन्वय यायेगु छगू हे खोरय् धुँ नं च्वले नं तयेगु थेंज्याःगु पुँजीवादी लाइन खः। तःधीम्ह न्यां चीधीम्ह न्या नइगु थेंज्याःगु मत्र्स्यन्याय अज्याःगु पुँजीवादी बन्दोबस्तय् कायम जुइ। धुँ व च्वले छगू हे खोरय् लाइगु इलय् धुं च्वलेयात अवश्य नं स्यानाः नइ। अथे हे वर्ग समन्वयया खँ ल्हाइपिं पुँजीवादी नेतातय्गु धारणा कथं तःमि व चीमि मिले याना वनेगु खँ ल्हाःसां तबि नं चीमिपिंत तःमिपिंसं टिके हे याइ मखु, बिस्थापित जुइत बाध्य याइ। अथे जुयाः नं वर्ग समन्वयया पुँजीवादी नारा पुँजीपति वर्गया हे जक जय जुइगु नारा खः। उकिं सर्वहारा वर्गया हीत जुइ फइ मखु ।

थज्याःगु वर्ग संघर्षयात अनेक कथं विस्थापित यायेगु निंतिं हे आः थीथी कथं जातीय नारा ल्ह्वनाः पार्टीतय्सं सर्वहारा संघर्षयात बिस्थापित यायेत स्वयाच्वंगु दु। जात जातिया जक खँ ल्हानां वर्ग संघर्षयात बिस्थापित यायेगु ज्या विदेशय् नं जू। थज्याःगु ज्याय् थनया धनीमानी पार्टी जक मखु अन्तर्राष्ट्रिय शक्ति नं लगे जुयाच्वंगु जुइफु। मखुसा वर्ग संघर्ष हे थःपिनि आज्जु तायेकीपिं कम्युनिष्ट पार्टीतय्सं वर्ग संघर्षयात हाथ्या बी कथं जातीय नारा जक छाय् थ्वयेकाच्वन? कम्युनिष्ट पार्टी छगू जाति, छगू भाषा, छगू धर्म जक च्वन्ह्याकेत पलिस्था जुइगु मखु। थ्वं फुक्क जाति, फुक्क भाषा व फुक्क धर्मया मुक्तिया खँ ल्हायेमाः ।

झीगु देय् ताः ई न्ह्यवंनिसें विदेशी प्रभाव लानाच्वंगु देश खः। थन प्रत्यक्ष रुपं गुगुं देशया उपनिवेश कायम मजूसां अप्रत्यक्ष रुपं न्ह्याबलें हे उपनिवेश कायम जुयाच्वंगु दु। अथे जुयाः नं थःगु देशया हीत अनुकूल नीति निर्माण याये फयाच्वंगु मदु। आः संविधान दयेकीगु इलय् नं अज्याःगु हे विदेशी प्रभाव लानाः द्वन्द्व कायम हे जुयाच्वनीगु सम्भावना खने दयावःगु दु। झीगु देशय् माओवादी जनयुद्ध व वयां लिपा जूगु शान्ति प्रक्रियाय् नं देशीविदेशी प्रतिक्रियावादी शक्तिं थःगु हीत अनुरुप रुची तयाच्वंगु झीसं खना हे च्वना। यदि नेपाली जनता सचेत जुइ मफुत धाःसा जनयुद्धया उपलब्धी नेपाली जनतां मखु प्रतिक्रियावादी शक्ति व विदेशीतय्त जू वनी। देशय् द्वन्द्व जुयाच्वंसा हे जक ज्या दइपिं वा लबः दइपिं हतियार तस्करतय्त लबः जुयाच्वनी। नेपाली जनता सदां सीगु व स्यायेगुली हे जक लगे जुयाच्वनेमाली ।

युद्ध व संघर्ष नं उपलब्धीहीन जुल धाःसा व बेकार खः। सर्वहारा अन्तर्राष्ट्रियवादयात हे त्वःताः वर्ग समन्वयया लँपुइ वनेगु धइगु पुँजीवादी भासय् चुर्लुम्म डुबे जुइगु खः। अथे जुयाः नं झिंनिदँ तकया जनयुद्धया उपलब्धीयात सकारात्मक रुपं काये मफुत धाःसा उकिं नकारात्मक लिच्वः लाकी। सर्वहारा वर्गयात शासक वर्गय् परिणत यायेत जूगु थज्याःगु युद्धपाखें वर्ग संघर्षयात झन झन च्वन्ह्याका यंकेत ग्वाहालि जुइमाःगु खः। तर युद्ध यानावःगु शक्ति हे थौं वर्ग संघर्ष व समाजवादी लक्ष्य प्रति धुरमुर जुजुं वनाच्वंगु दु। थःपिंके स्पष्ट अडान मंत धाःसा न्ह्याम्हं मनू स्यनेफु। कम्युनिष्ट पार्टीयाके मार्क्सवाद, लेनिनवाद व माओत्सेतुङ बिचाः अनुरुप ज्या यायेगु क्षमता मंत धाःसा उगु पार्टी कम्युनिष्ट पार्टी कथं कायम जुइ फइ मखु। माओवादी पार्टी थौं अथे हे जुयाच्वंगु दु। म्हिगःया आदर्श, विचार व सिद्धान्तयात छगू छगू यायां त्वःता सर्वहारा संघर्षया खँ स्वयां नं सरकारय् गथे वनेगु, चुनाव गथे त्याकेगु व थः मनूत थीथी राजनीतिक व उच्च तहलय् गथे थ्यंकेगु धइगु अप्वः चिन्तन जुयावःगु दु ।

संविधान बांलाःगु दयेकेगु दकलय् महत्वपूर्ण खँ खः। तर आः संविधान याकनं दयेकेमाःगु खँय् सभासद्तय् बहस केन्द्रित जुयाच्वंगु दु। कम्युनिष्ट पार्टीनिसें थीथी पार्टीया सभासद्तय्सं सदनय् नं वर्ग संघर्ष व सर्वहारा सर्वोच्चताया खँ स्वयां नं मेगु हे खँय् अप्वः ध्यान बियाच्वंगु दु ।

जनतायाके मत फ्वनेत जक पार्टीया खँ ल्हानाः आः थःगु स्वार्थ पूवने धुनेवं अनेक कथं सदन ताःहाकः याना तयेगु, यक्व भत्ता नयेगु व सरकारय् वनाः जूसां सरकार त्वःताः जूसां अनेक उपाय यानाः ध्यबा हे जक मुंकेगु थेंज्याःगु अराजनीतिक गतिविधि अज्याःपिं सभासद्तय्सं यानाच्वंगु दइ। उमित देश व जनताया हीत स्वयां नं थःगु हीत जुइमाःगु दु। वास्तवय् कम्युनिष्ट पार्टी धइगु हे देशय् परिवर्तन हयेगु निंतिं स्थापना जुइगु जुयाः कम्युनिष्ट पार्टीं सर्वहारा वर्गया संघर्षयात त्वःते मजिउ। सरकारय् वनेगु स्वयां नं वर्ग संघर्ष च्वन्ह्याका यनेमाः ।

More Stories Like this