दैलेख प्रहरी चौकी आक्रमण
न्हय्म्ह प्रहरी घाःपाः, ल्वाभः लुटेयात
येँ (सन्ध्या टाइम्स)/दैलेखया कुसापानी लागाया पानीपोखरी इलाका प्रहरी ज्याकुथिइ छेँय् छ्यलीगु ल्वाभः ज्वना वःपिं सछिम्हं मल्याक स्थानीय मनूतय्सं आकाझाकां आक्रमण यानाः न्हय्म्ह प्रहरी घाःपाः याना बिउगु दु ।
उगु आक्रमणय् प्रहरीया ल्वाभः नापं बन्दोवस्तीया सामान तकं लुटे याना यंकूगु खँ प्रहरीं धाःगु दु। ल्वापुइ लानाः छुं स्थानीय मनूत नं घाःपा जूगु दु धाःसां उमिगु ल्याः धाःसा सीके मफुनि ।
वंगु चान्हय् खुकुरी, भाला, कथि नापं थीथी कथंया घरेलु ल्वाभः ज्वनाः स्थानीय मनूतय्सं उगु प्रहरी चौकीइ आक्रमण याःगु खःसा उकी लानाः इलाका प्रहरी भवन हे ध्वस्त जूगु दु।
आक्रमणय् लानाः घाःपाः जूपिं न्हय्म्ह प्रहरी मध्ये हवल्दार बरुण थापाया अवस्था चिन्ताजनक जुयाच्वंगु दु। वयात नेपालगञ्जय् वासः याकाःलि थौं सुथय् भारतया लखनउ यंकूगु दु। अथे हे घाःपाः जूम्ह असई प्रेम थापायात दैलेखया जिल्ला अस्पतालय् वासः याकाच्वंगु दु। मेपिंत स्थानीय स्वास्थ्य चौकीइ वासः याकातःगु दु। स्थानीय मनूतय् उगु आक्रमणय् लानाः छगः मोटरसाइकल नं ध्वस्त जूगु दु।
म्हिगः होलिया झ्वलय् दैलेखया कुसापानी लागाया स्थानीय मिस्तय्त प्रहरीं दुर्व्यवहारपूर्वक ल्हाः तल धासें आक्रोशित जूपिं स्थानीय मनूतय्सं आकाझाकां प्रहरी चौकीइ आक्रमण याःगु खः ।
दैलेखया सदरमुकामं पश्चिमपाखे ४ घण्टा न्यासिवन कि उगु प्रहरी चौकी थ्यनी। चौकीइ आक्रमणलिसे स्वापू दुपिं धकाः प्यम्हेसित ज्वनेधुंकूगु दु। अन थौं सुथय् तकं स्थानीय मनूत व प्रहरी दथुइ कचमच जुयाच्वंगु दनि। थुकिं यानाः अन गुगुं नं इलय् हानं नं अप्रिय घटना जुइफु धकाः जःखः च्वंगु इलाका प्रहरी ज्याकू व जिल्ला प्रहरी ज्याकुथिं थप प्रहरी बल उखे वनेधुंकूगु दु ।
