ख्वपय् बँया क्वय् तपस्या

कृष्ण

थौं स्वयां झिंन्यादँ न्ह्यः डा. योगी विकाशानन्दं ख्वपया खौमा त्वालय् न्हापांखुसी योगया बारे प्रवचन बियाः मनोक्रान्ति राष्ट्रिय अभियान न्ह्याकादीगु खः। आः वयाः ख्वपय् वय्कःया अथे हे झिंन्यासः ति साधकत परिचालित जुयाच्वंगु दु। मनोक्रान्ति नेपाःया निंतिं न्हूगु विषय खः। तर डा. योगी विकाशानन्दं विदेशया शिक्षायात नं थन हयाः उकिया बांलाःगु पक्षयात ग्यसुलाक प्रचार प्रसार यानादिल नापं लाखौं योग साधकत नं तयार यानादिल ।

मनोक्रान्ति छुं धर्म मखु। थ्व छगू अभ्यास खः। अथे जुयाः हे मनोक्रान्तिया लँपुइ न्ह्यःने वंपिं मनूत थथे ताः ई तक मनसे मत्वँसे साधना यायेत ताःलाइगु खः। थनया साधकत छुं नं कथंया राजनीतिक दर्शनं प्रभावित मखु। उपिं ला बांबांलाःगु गुण जक नालाः बांमलाःगु गुणयात त्वःतु त्वःतुं वनाच्वंपिं भौतिकवादी खः। मनूतय् जीवनय् बांमलाःगु चीज जकं अप्वः प्रभावित जुयाः स्वप्याना तयेगु बानी दु। अथे मयासे बांमलाःगु त्वःतेगु व बांलाःगुयात नाला वनेगु हे मनोक्रान्ति खः। थ्वहे मनोक्रान्तिया दर्शन कथं थुगुसी ख्वपय् निक्वःखुसी थथे निराहार तपश्या च्वंगु खःसा अन हे मिइ न्यासि वनेगु अभ्यासया प्रदर्शन नं याःगु खः ।

थज्याःगु ताःई तकया तपस्या दछि न्ह्यः पुस महिनां तपश्वी रविनानन्दं ख्वपया सल्लाघारीइ च्वंगु ९९ रोपनीया विवादास्पद चौरय् च्वनादीगु खः। वय्कलं उगु इलय् लछियंकं थज्याःगु तपस्या च्वनादीगु खः। हिन्दू धर्मावलम्वीतय् ब्रत च्वनी थें हे थुगु तपस्या च्वनीपिनि नं लः व सिसाबुसा जक नयाः म्हयात सफा याइगुलिं शारीरिक रुपं कमजोर जूसां योग साधनाय् मन वा दिमागं ज्या यानाच्वनी। तपश्वी रविनानन्दया हे सानिध्यय् योगानन्द योगाङ्क नांया साधकं थुगु आँट यानादीगु खः। आः वय्कः वडा नं. ४ लामुगाः चौरय् २१ न्हुया निंतिं वंगु मंगलवाःनिसें निराहार तपस्या च्वनादीगु दु ।

वास्तवय् झीके गुलि शक्ति दु धइगु खँ झीसं सी मखु। थथे थःके दुगु फुक्कं शक्तियात परिचालन यायेगु निंतिं हे मनोक्रान्ति राष्ट्रिय अभियानं रेकी, योग, सुपर लर्निङ्ग व साइको नाइन शिक्षा प्रदान यानाच्वंगु खः। गुकिं ब्यक्तियात छुं नं चीजय् मग्याकीगु ला जुहे जुल नापं थःगु लक्ष्यपाखे वनेगु निंतिं नेतृत्वया विकास नं याइ। धरहरा, सामाखुसी व गोदावरीइ मनोक्रान्तिया थीथी शाखा उपशाखात केन्द्रीय स्तरं न्ह्याकाच्वंगु दु। अथे हे आः ख्वपय् नं मनोक्रान्ति राष्ट्रिय अभियान शाखा नीस्वनाः ज्या शुरु जुयाच्वंगु दु। थुकी आपालं साधकत उकी सहभागि जुल। उकी मध्ये ख्वप २ वडाया जगातिइ च्वंम्ह १२ कक्षाया विद्यार्थी लक्ष्मीप्रसाद सुवाल नं छम्ह खः। वय्कःयात हे आः तपस्या च्वनाच्वंम्ह योगानन्द योगाङ्क धाइगु खः ।

मां रामप्रसाद व अबु नानीछोरीया २५ दँ दुम्ह काय् वय्कःयात छक्वलं थथे द्यांलाकाः तपस्याय् छ्वःगु मखुसें न्हापां जा नकु नकुं न्हिं छछाः जक जा नकेगु अभ्यास याकूगु खः। लिपा जाउलो जक नकेगु याना वन। वयां लिपा मुगी व लिपा सिसाबुसा जक नकेगु याना यंकल। क्रमशः लिपा जूलिसे लः जक त्वनाः नं म्याये फइगु यानाःलि थथे भूतपस्याय् संलग्न याकूगु खः। अन दुने वय्कलं 'ओ गअम् गणपतिय नमः' उच्चारण यानाच्वंगु दइ। गुकिं वय्कःयात ककु सफा यायेत ग्वाहालि जुइसा ई फायेत नं ग्वाहालि जुइ। लः बाहेक वय्कलं आः तकं छुं ठोस वस्तु नयेगु यानाच्वंगु मदु। थ्व नं अभ्यासं हे सम्भव जूगु खः। मिइ न्यासि वनेगु ज्या नं लामुगाः चौरय् याःगु खः। गुकी झिंनिम्ह साधकतय्सं छुं हे थाकु मचासं मिइ न्यासि वनाः क्यंगु खः। थथे थःगु शक्तियात पहिचान यानाः अभ्यास यायेगु ज्या हे सुपर लर्निङ्ग खः धकाः तपश्वी योगानन्द योनाङ्कया सहयोगी श्याम किजूं सन्ध्या टाइम्सयात कनादिल ।

More Stories Like this