'सकारात्क पक्षया रक्षा यासें मगाःगु अधिकारया निंतिं संघर्ष'

नेवाः स्वायत्त राज्य मंकाः संघर्ष समितिं संविधानसभाया राज्य पुनर्संरचना समितिं तयार याःगु झिंप्यंगू प्रदेशया मस्यौदाया बारे थःगु अवधारणा पितब्यूसें थुकी दुथ्याःगु सकारात्मक पक्षया रक्षा यासें मगाःगु अधिकारया निंतिं संघर्ष यायेमाःगु खँ धाःगु दु ।

शुत्रवाः येँया क्षेत्रपाटी पार्टी प्यालेसय् जूगु छगू ज्याझ्वःया दथुइ संघर्ष समितिया सचिवालय कजि मल्ल के. सुन्दरं समितिया अवधारणा पितबियादिसें राज्य पुनर्संरचना समितिया मस्यौदा पहिचानया आधारय् न्ह्यब्वयेगु ज्या जूगु नापं थुकी आत्मनिर्णयया अधिकार, अग्राधिकार थंज्याःगु पक्ष दुथ्याकातःगु सकारात्मक पक्ष जुसां नेवाः राज्यया सिमाङकण थनया जनसंख्या, जनघनत्तो, प्राकृतिक स्रोत व इतिहासया आधारय् तसंक चीकू जूगु धयादिल । नापं वय्कलं नेवाः राज्य दोल्खा, भिमफेदी, त्रिशुली तक जुइमाःगु कनादिल ।

अथेहे राज्य पुनर्संरचना समितिं पेश याःगु मस्यौदाय् अविशिष्ट अधिकार केन्द्रयात बियातःगु न्ह्यथंनादिसें वयकलं थ्व अधिकार राज्य व प्रदेशयात बीमाःगु धयादिल । समितिया अवधारण बारे सभासद्त बुद्ध साय्मि, हितमान शाक्य, तीर्थराम डंगोल व मंगलसिद्धि मानन्धरं थःथःगु बिचाः प्वंकादीगु खः ।

संघर्ष समितिया नायः नरेश ताम्राकारया सभापतित्वय् जूगु ज्याझ्वलय् नेवाः स्वायत्त राज्यया म्येँ च्वयादीम्ह जनकवि दुर्गालाल श्रेष्ठ, म्येँ लय् चिनादीम्ह संगीतकार तीर्थ माली व नेवाः राष्ट्रिय ध्वाँय् तयार यानादीम्ह कलाकार रामकृष्ण नकःमियात हंगु खः । वय्कपिंत संघर्ष समितिया सल्लहाकारपिं पद्मरत्न तुलाधार, माणिलाल श्रेष्ठ व भिम्सेनदास प्रधानं सम्मान यानादीगु खःसा नेपालभाषा एकेडेमीया चान्सलर सत्यमोहन जोशीं सिन्ह व स्वामाः क्वख्यायेकाः सम्मान यानादीगु खः ।

ज्याझ्वलय् नेवाः राष्ट्रिय ध्वाँय् तयार यानादीम्ह कलाकार रामकृष्ण नकःमियायात समितिया नायः ताम्राकारं झिंन्याद्वं दां सम्मान स्वरुप लःल्हानादीगु खः ।

नेपालभाषा एकेडेमीया चान्सलर सत्यमोहन जोशीं उल्लेज्या यानादीगु ज्याझ्वलय् मदन शर्मां लसकुस यानादीगु खःसा समितिया दांभरी उर्मिला डंगोलं सुभाय् देछानादीगु खः ।

किपा :- राजेश नेवाः

More Stories Like this