चमेलिया शिलान्यासया विरोध

प्राधिकरणया कर्मचारीं आन्दोलन याइगु

येँ (सन्ध्या टाइम्स)/घाटाय् वनाच्वंगु नेपाल विद्युत प्राधिकरणं थःपाखें सञ्चालित चमेलिया जलविद्युत परियोजनाया ज्या हे बछि सिधयेधुंकाः हानं शिलान्यास यायेगु धकाः यानाच्वंगु तयारीयात अनया कर्मचारीतय्सं विरोध याःगु दु
।
सुदूर पश्चिमया दार्चुला जिल्लाया शिखर गाविस वडा नं. ४ या बलाँच धाःगु थासय् उगु परियोजना सञ्चालन जुयाच्वंगु खः। ३० मेगावाट विद्युत उत्पादन याइगु उगु परियोजनाया ज्या थौंकन्हय् ४० प्रतिशत सिधयाच्वने धुंकल। उलिमछि ज्या सिधयेधुंकाः ज्या शुरु याये न्ह्यः हे जुइमाःगु शिलान्यासया ज्या आः वयाः तिनि यायेत्यंगु कारणं प्राधिकरणया कर्मचारीतय्सं विरोध याःगु खः। कर्मचारी सूत्रं धाः कथं उगु शिलान्यासया ज्या यायेगु लागिं प्रधानमन्त्री माधव नेपाल लगायत मन्त्रीतय्त समेत हेलिकप्टरपाखें उखे यंकेत्यंगु दु। आइतवाः होलिपुन्हिया बिदा कुन्हु उगु शिलान्यास याइगु ज्याझ्वः दयेकातःगु दु। थ्व शिलान्यासया ज्या छगू सम्पन्न यायेत म्होतिं नं २७-२८ लाख ति खर्च तुइगु अनुमान दु। अनावश्यक रुपं थुलिमछि दां खर्च यानाः याये हे म्वाःगु शिलान्यास यायेत्यन धकाः कर्मचारीतय्सं थ्व विरोध यायेत्यंगु खः ।

कोरियाली कम्पनीलिसे जानाः यायेत्यंगु थ्व परियोजना तसकं थिकेगु जूगुलिं नेपालय् आलोचनाया विषय जुयाच्वंगु दु। थ्वं मत उत्पादन शुरु यात कि उकियात लागत खर्च तसकं अप्वइगु खँ धयाच्वंगु दु। उकिं सरकारपाखें अज्याःगु खँ पिहां मवयेमा धकाः प्रधानमन्त्री व मन्त्रीतय्त खुसी यायेत उगु ज्याझ्वः यायेत्यंगु खँ नं धाःगु दु। थुकिया विरोधय् थौं कर्मचारीतय्सं प्राधिकरणय् हे छगू पत्रकार सम्मेलनपाखें भण्डाफोर यायेत्यंगु दु ।