आः व्यापारीतय्त ज्यान कायेगु ख्याच्वः

उद्योगधन्दा चौपट जुयाः कायल जुयाच्वंपिं देय्या व्यापारीतय्त थीथी सशस्त्र पुचःतय्सं चन्दा मबिल धाःसा ज्यान हे कायेगु धकाः ख्याच्वः बिया हयाच्वंगु कारणं देय्या व्यापारिक पुचः आतंकित जूगु दु। न्हापा थज्याःगु ख्याच्वः तत्कालिन भूमिगत पार्टी माओवादीपाखें जक बीगु याना हयाच्वंगु खःसा आः तराई लागाय् सक्रिय जुयाच्वंगु थीथी नांया सशस्त्र पुचःतय्सं अज्याःगु ख्याच्वः बीगु याना हःगु दु। नेपाःया आपालं व्यापारी उद्योगपतितय् कारखानात अप्वः यानाः तराई लागाय् हे दुगु कारणं उमिसं बिया हइगु अज्याःगु ख्याच्वलं लिच्वः लाकीगु नं स्वाभाविक खः। लिसें देय्या सुरक्षास्थिति थुलि कमजोर जुयाच्वंगु दु कि थन सुयागु स्थिति गबलय् छु जुइ धकाः धाये फइगु अवस्था मदु। सरकारं शान्ति सुरक्षा कायम याये धकाः न्ह्याक्व हे भाषण याःसां सरकारं बी धाःगु सुरक्षाया छुं हे भरोसा मदु। अति राजनीतीकरण व भ्रष्टाचारं यानाः देय्या सुरक्षा निकाय हद दर्जाया निकम्मा साबित जुजुं वनाच्वंगु दु। उकिं निहत्था व्यापारीतय्त गुगुं छगू थासं ज्यान काये धकाः ख्याच्वः वल धाःसा उमिसं छुं याये फइ मखु धकाः ढुक्क जुयाच्वनेगु अवस्था मदु। तिन्हिनय् हे सतकय् वयाः मनूयात गोलीं कयेकाः सुरक्षितपूर्वक बिसिउँ वनेगु आः थनया सामान्य घटना जुइधुंकल ।

उकिं व्यापारीतय्त वयाच्वंगु थज्याःगु ख्याच्वलं उमिगु मनोबल कुहां वनाः देय्या उद्योगधन्दा अझ स्यना वनीगु खतरा छखे दुसा मेखे नागरिकया जिउज्यानया सुरक्षाय् राज्य गम्भीर जुइ मफुगु विडम्बना कायम दु। वास्तवय् थ्व धइगु हे देय् असफल राष्ट्रया लँपुइ वनाच्वंगुया चिं खः ।

More Stories Like this