जातीय राज्य घोषणा खारेजीया शर्त

माओवादीलिसे यदि संवाद यानाः न्ह्यायेगु खःसा माओवादीं पालना यायेमाःगु शर्त धकाः एमालें आः नकतिनि न्हय्गू शर्त न्ह्यःने हःगु दु। तर एमालें न्ह्यःने हःगु उगु शर्त गुलिखे सवालय् धाःसा थःगु हे अवधारणा स्वयां पिहां वनाच्वंगु खनेदु। उकिं एमालें थज्याःगु शर्त छाय् व छु आधारय् हल धइगु न्ह्यसः ब्वलंगु दु ।

एमालें न्ह्यःने हःगु उगु शर्तया दकलय् आपत्तिजनक बुँदा खः माओवादीं घोषणा याःगु जातीय राज्यत खारेज यायेगु। माओवादीपाखें घोषणा यानातःगु उगु जातीय राज्यतय्त सम्बन्धित फुक्क हे जातितय्सं समर्थन यानातःगु दु। अय् जूगुलिं उगु ज्याझ्वः माओवादीं याःगु खःसां उकियात देय्या सकलें आदिवासी जनजातिया अनुमोदन दु। उलि जक मखु स्वयम् एमालें संविधानसभाय् बुझे याःगु थःपिनि राज्य पुनर्संरचना सम्बन्धी अवधारणाय् नं जातीय राज्यया प्रस्ताव यानातःगु दु। थःपिनिगु अवधारणालिसे ज्वःलाःगु घोषणा जूगुलिं एमालें ला उगु घोषणायात समर्थन यायेमाःगु खः। तर अःखतं उकियात खारेज यायेमाः धकाः माग याःगुलिं एमाले थःपिंसं हे तयार यानातःगु अवधारणां पिहां वंगु आशंका ब्वलंगु दु। थ्व माओवादीया अवधारणा जक मखु देशय् ब्वलनाच्वंगु न्हूगु सोच व जनताया चाहना विपरित नं खः ।

थ्व बाहेक शिविर खाली यायेमाः धइगु छगू शर्त स्वयम् एमालें हे यानाः मजुयाच्वंगु खँय् विवाद मदु। रक्षा मन्त्री विद्या भण्डारीं सेना समायोजन बारे न्ववानादीगु धापुतिं यानाः थुकिं अवरोध ब्वलंगु खः। उकी उल्लेखित मेमेगु बुँदाय् धाःसा माओवादी सहमत जुइ हे माःगु खनेदु। उकिं हे माओवादीया इमान्दारिता नं पिलुइ ।

More Stories Like this