ख्वपय् बलात्कार लिपा हत्या

थामय् चिनाः स्यानातःम्ह मिसाया लाश लुल

येँ (सन्ध्या टाइम्स)/ ख्वप नगरपालिका वडा नं.४ या महालक्ष्मी स्थान बेखाल धइगु थासय् छम्ह मिसायात बलात्कार यानाः स्याना तःगु अवस्थाय् लुइकूगु दु।
आः तक सनाखत जुइ मफुनिम्ह अथे हे २५ दँ ति दुम्ह उमि मिसाया शव बेखाल लागाया सुनसान लँय् वांछ्वयातःगु अवस्थाय् थौं सुथय् लुइकूगु खः। सुथय् ६ बजेपाखे स्थानीय मनूतय्सं लाश खंकाः ख्वपया प्रहरीयात जानकारी बिउगु खः। १० बजेपाखे प्रहरी वयाः मुचुल्का दयेकाः लाश अस्पतालय् यंकूगु दु ।

लाश लूगु जानकारी वयेवं चाँगुइ च्वंपिं छथ्वः मनूत उम्ह सीम्ह मिसा थःपिनि थःथथिति खः धकाः दावी याः वःगु खँ स्थानीय मनूतय्सं धाःगु दु। चाँगुया कामी समुदायया छम्ह मिसा तनाच्वंगु व आः लाश लूम्ह मिसा वहे जुइमाः धकाः उमिसं दावी याःगु खँ नं धाःगु दु ।

लँय् खःसां नं भचा सुनसान थासय् दयेकातःगु छगू टहराय् थामय् चिनातःगु अवस्थाय् मिसाया लाश लूगु खः। मिसाया सुरुवाः नं त्वका तःगु अवस्थाय् दुगुलिं वयात सामुहिक बलात्कार यानाः हत्या याःगु जुइमाः धकाः अनुमान याःगु दु।
मिसायात वयागु हे सलं ककुइ चिनाः स्यानातःगु दुसा म्हय् दायातःगु नं खनेदु। घटनास्थलया प्रकृति स्वयेबलय् मिसां बलात्कारीत लिसे प्रतिकार नं याःगु खनेदु। लिसें मिसाया योनी क्षतविक्षत जुयाच्वंगु व बँय् मिजंतय् वीर्य तकं लानाच्वंगु खनेदुगुलिं बलात्कारीत तःम्ह दयेमाः धकाः अनुमान याःगु दु ।