परराष्ट्र मन्त्रालय दुने हे पासपोर्ट तस्कर

नेपाःया परराष्ट्र मन्त्रालयय् सुनां हे न्ह्याये मदयेक तयातःगु पासपोर्ट तकं तनीगु व अज्याःगु पासपोर्ट तस्करतय्थाय् थ्यनाः उकिया दुरुपयोग जुयाच्वंगु खँ ब्यापक रुपं पिहां वःगु दु। खतुं परराष्ट्र मन्त्रालय दुने तयातःगु पासपोर्ट तनाः पिने तस्करतय् ल्हातय् लाइगु खँ न्हूगु मखु। थ्व न्हापांनिसें हे जुया वयाच्वंगु खँ खः। तर थुगुसी थ्व विषययात कयाः गुगु खँ न्ह्यःने वल, व धाःसा तसकं ग्यानापुगु प्रकृतियागु खनेदु। पासपोर्ट खुया कायेगु ज्याय् परराष्ट्र मन्त्रालयया कर्मचारीत स्वयम् हे छगू गिरोहया रुपय् सक्रिय जुयाच्वंगु दु। उमिसं हे पासपोर्ट खुयाः तस्करतय्त मीगु खः। सुं पिनें वःपिं मनूतय्सं खुया काइगु ज्यायात ला छुं नं उपाय यानाः पने फइ, तर दुनें हे खुया काइपिं मनूत दुसा उमित पनेत धाःसा थाकुइफु। हाल परराष्ट्र मन्त्रालय दुने थज्याःगु हे जुयाच्वंगु दु। ताःई न्ह्यवंनिसें हे जुया वयाच्वंगु थ्व ज्याया लिउने परराष्ट्रया चीधंपिं जक मखु तःधंपिं हे कर्मचारीतय् समेत ल्हाः दुगु खँ अःपुक थुइकेफु। थुकियात पनेगु लागिं छुं चीधंगु जक पलाः ल्ह्वनां गाइ मखु। उकिया निंतिं विशेष कथंया हे अपरेशन न्ह्याकाः अपराधी ज्वनेगु कुतः जुइमाः ।

नेपालय् परराष्ट्र मन्त्रालय दुनें हे थथे पासपोर्ट खुयाः तस्करतय् ल्हातय् थ्यनीगु जुयाः सुरक्षाया दृष्टिकोणं नं नेपाःयात कमजोर देय्या रुपय् झी जःलाखःला देय् चीन व भारतं कायेगु यानाच्वंगु दु। नेपाःया सुरक्षाया विश्वसनीयतायात हे थुकिं धक्का लाकाच्वंगु दु। उकिं नं थ्व ज्यायात पनेगु लागिं सरकारपाखें गुलि गम्भीर कथंया पलाः ल्ह्वनेमाः धइगु खँ उलाच्वंगु दु ।

More Stories Like this